कपनको मिलनचोकमा ढलमा खसेर बेपत्ता भएका बालक ६ दिन पछि मृत फेला परेका छन्।
१० वर्षका बालक उज्ज्वल विश्वकर्माको ललितपुरको बागमती गाउँपालिका–१ स्थित घुसेलमा शव भेटिएको प्रहरीले जनाएको छ। उज्जवलको परिवारले सखानत गरिसकेका छन्। उनको शव पोष्टमार्टमका लागि त्यहाँबाट पाटन हस्पिटलमा लगिने बताइएको छ।
बुढानीलकण्ठ नगरपालिका वडा नम्बर १० र काठमाडौं महानगरपालिका वडा नम्बर ६ को सीमानामा रहेको मिलनचोक तरकारी बजार नजिकैको ढलमा असोज ४ गते साँझ एक बालक खसेका थिए।
स्थानीयले बालक खसेको देखेपछि प्रहरीलाई खबर गरेका थिए।
राजधानीका अधिकांश ठाउँमा ढल, खानेपानीलगायतका निम्ति बनाइएका खाडलहरु धराप बनाएर खुला छाडिएका छन्, जहाँ दुर्घटनाको ठूलो जोखिम छ ।