आज बिहानैदेखि काठमाडौँ उपत्यकामा सिमसिमे पानी परिरहेको छ । पानी परेपछि मौसम चिसो छ । तर, राजनीतिक सरगर्मी भने आज दिनभर तातिरहेको छ ।
संसदमा विश्वासको मत दिनबाट अनुपस्थित भएका माधव नेपाल पक्षका सासंदहरुले राजीनामा दिएको खण्डमा प्रधानमन्त्री पद नै जाने भएकाले केपी शर्मा ओलीले नेपाल पक्षसँग अन्तिम समयमा आएर भेटवार्ता गर्ने भएका छन् ।
भेटवार्ता सहज बनाउनको लागि नेकपा एमालेले वरिष्ठ नेता माधवकुमार नेपालसहित चारजना नेतामाथि गरिएको कारबाही फुकुवा गरेको छ।
पार्टी हितविरुद्ध गएको भन्दै स्पष्टीकरण सोधेर ६ महिनासम्म गरिएको निलम्बनको कारबाही एमालेले फुकुवा गरेको हो । केही व्यक्तिहरुले भने ह्विप उल्लंघन गरेकोमा कारवाही हुनपर्नेमा निलम्बन फुकुवा गरेर ओलीले नेपाल पक्षलाई पुरस्कार दिएको बताएका छन् ।
एमाले वरिष्ठ नेता झलनाथ खनाल, नेता माधवकुमार नेपालसहितका नेताले प्रतिनिधिसभा सदस्यबाट राजीनामा गरेको अवस्थामा मात्र अहिलेको अवस्थामा वैकल्पिक सरकार गठनको ढोका खुल्नेछ ।
एमालेको नेपाल पक्षका प्रत्यक्षतर्फका १९ जनाले राजीनामा दिँदा प्रतिनिधिसभामा सांसद सङ्ख्या २ सय ५२ हुन्छ ।
बहुमतका लागि १ सय २७ आवश्यक हुन्छ । यसमा ठाकुर पक्षका दुई सांसद तानेर बहुमत पुग्न सक्छ । यस्तो अवस्थामा आफ्नो प्रधानमन्त्री पद गुम्ने भएपछि ओलीले अन्तिम समयमा आएर नेपाल पक्षसँग कुराकानी गर्न लागेका हुन् ।
आज बेलुका ९ बजेसम्म कुनै चमत्कारिक सहमति भएन भने राति पुनः प्रधानमन्त्रीमा ओली नियुक्त हुनेछन् ।