काठमाडौं । नेपाल प्रिमियर लिग (एनपीएल) को तेस्रो संस्करण खेल्न दक्षिण अफ्रिकाका चर्चित ब्याटर डेविड मिलर नेपाल आइपुगेका छन् । कर्णाली याक्समा अनुबन्ध भएका ३७ वर्षीय मिलर बुधबार बिहान त्रिभुवन अन्तर्राष्ट्रिय विमानस्थलमा अवतरण गरेका हुन् ।
विमानस्थलमा उनलाई कर्णाली याक्स स्पोर्ट्स प्रालिका प्रतिनिधिहरूले स्वागत गरेका थिए । बायाँहाते मध्यक्रमका ब्याटर मिलरले दक्षिण अफ्रिकी राष्ट्रिय टोलीसँगै विश्वका चर्चित फ्रेन्चाइज क्रिकेट प्रतियोगितामा उत्कृष्ट प्रदर्शन गर्दै आफ्नो पहिचान बनाएका छन् ।
उनले भारतको इन्डियन प्रिमियर लिग (आईपीएल), अस्ट्रेलियाको बिग बास लिग, पाकिस्तान प्रिमियर लिगलगायत विभिन्न प्रतियोगिता खेलिसकेका छन् । आईपीएलमा उनले दिल्ली क्यापिटल्स, राजस्थान रोयल्स, किङ्स ११ पञ्जाब र गुजरात टाइटन्सबाट खेलेका थिए । सन् २०२२ मा गुजरात टाइटन्सले आईपीएलको उपाधि जित्दा मिलर टोलीका महत्वपूर्ण खेलाडी थिए ।
कर्णाली याक्स स्पोर्ट्स प्रालिका अध्यक्ष गृहेन्द्र घिमिरेले मिलरको आगमनले नेपालको पर्यटन प्रवर्द्धनमा समेत योगदान पुग्ने विश्वास व्यक्त गरेका छन् ।
मिलरले दक्षिण अफ्रिकाबाट १४० टी–२० अन्तर्राष्ट्रिय खेलमा दुई हजार ८०४ रन बनाएका छन् । यसक्रममा उनले दुई शतक र नौ अर्धशतक प्रहार गरेका छन् । उनका दुवै टी–२० अन्तर्राष्ट्रिय शतक भारत र बंगलादेशविरुद्ध बनेका हुन् ।
समग्र टी–२० क्रिकेटमा ५८४ खेल खेलेका मिलरले १२ हजार ४३५ रन बनाएका छन् । उनले यसक्रममा चार शतक र ५३ अर्धशतक प्रहार गरेका छन् । सन् २०१७ मा बंगलादेशविरुद्ध उनले ३५ बलमै शतक प्रहार गरेका थिए । यस्तै, आईपीएलमा पञ्जाबबाट खेल्दै रोयल च्यालेन्जर्स बैंग्लोरविरुद्ध ३८ बलमा शतक बनाएका थिए ।
कात्तिक ९ गतेदेखि सुरु भएको एनपीएलमा कर्णाली याक्सले हालसम्म तीन खेल खेलेको छ । टोलीले पहिलो खेलमा जनकपुरलाई १९ रन र दोस्रो खेलमा विराटनगरलाई चार विकेटले पराजित गरेको थियो । तेस्रो खेलमा भने काठमाडौं गोर्खाजसँग चार विकेटले पराजित भएको थियो ।
कर्णालीले अब शुक्रबार सुदूरपश्चिम रोयल्ससँग प्रतिस्पर्धा गर्दैछ । उक्त खेलमा मिलरले कर्णालीको जर्सीमा मैदान उत्रिने अपेक्षा गरिएको छ ।
