काठमाडौं । महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षामन्त्री सीता बादी र नेपालका लागि अमेरिकी कार्यवाहक राजदूत मेगन बोल्डिनबीच भेटवार्ता भएको छ ।
भेटवार्तामा नेपाल–अमेरिका सम्बन्ध, बाढी प्रभावित क्षेत्रको पुनःस्थापना तथा पुनर्निर्माण, मानव बेचबिखन तथा ओसारपसार नियन्त्रण र सामाजिक विकासका क्षेत्रमा सहकार्य विस्तार गर्ने विषयमा छलफल भएको हो ।
सो अवसरमा कार्यवाहक राजदूत बोल्डिनले रसुवाको भोटेकोशीमा गएको बाढीमा परी ज्यान गुमाएकाप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरिन् । उनले बाढी प्रभावित समुदायको अवस्था तथा पुनःस्थापनाका प्रयासबारे चासो राख्दै नेपालसँग सहकार्यलाई निरन्तरता दिने प्रतिबद्धता व्यक्त गरिन् ।
मन्त्री बादीले नेपाल र अमेरिकाबीच सन् १९४७ देखि कायम कूटनीतिक सम्बन्ध पारस्परिक सम्मान, विश्वास, विकास सहकार्य र जनस्तरीय सम्बन्धमा आधारित रहेको बताइन् । उनले आगामी दिनमा दुई देशबीचको सहकार्य थप विस्तार हुने विश्वास व्यक्त गरिन् ।
मन्त्री बादीले गत अगस्ट २६ मा नेपाल–तिब्बत सीमा क्षेत्रमा गएको बाढीका कारण महिला, किशोरी तथा बालबालिकाको सुरक्षा, संरक्षण र शिक्षाका क्षेत्रमा थप चुनौती सिर्जना भएको जानकारी गराइन् । उनले बाढी प्रभावित क्षेत्रको पुनःस्थापना तथा पुनर्निर्माणमा अमेरिकी सहयोग र सहकार्यको अपेक्षा व्यक्त गरिन् ।
बाढी प्रभावित समुदायको उद्धार, राहत, पुनःस्थापना तथा पुनर्निर्माणका लागि सरकारले उपलब्ध स्रोत, साधन र जनशक्ति परिचालन गरेर काम गरिरहेको पनि मन्त्री बादीले जानकारी दिइन् । मन्त्रालयले आफ्नो कार्यक्षेत्रअन्तर्गत जोखिममा रहेका महिला, बालबालिका, ज्येष्ठ नागरिक, अपाङ्गता भएका व्यक्ति तथा अन्य सीमान्तकृत समुदायको संरक्षण र सामाजिक सुरक्षालाई प्राथमिकतामा राखेको उनको भनाइ थियो ।
भेटवार्तामा मानव बेचबिखन तथा ओसारपसार नियन्त्रणका विषयमा समेत विस्तृत छलफल भएको थियो ।
