काठमाडौँ । परराष्ट्रमन्त्री शिशिर खनाल जलवायु परिवर्तनसम्बन्धी ‘प्रि–कोप लिडर्स इभेन्ट’मा सहभागी हुन शनिबार फिजी जाने भएका छन्।
फिजी र टुभालुमा आगामी १९ र २० असोजमा आयोजना हुने उक्त कार्यक्रममा मन्त्री खनालको नेतृत्वमा चार सदस्यीय नेपाली प्रतिनिधिमण्डल सहभागी हुने परराष्ट्र मन्त्रालयले जनाएको छ।
मन्त्री खनालले २० असोजमा हुने लिडर्स प्लेनरीलाई सम्बोधन गर्ने कार्यक्रम छ। त्यसअघि उनले पलाउका राष्ट्रपति तथा अस्ट्रेलिया र फिजीका प्रधानमन्त्रीसँग संयुक्त रूपमा आयोजना हुने सञ्चारकर्मीसँगको प्रश्नोत्तर कार्यक्रममा समेत सहभागिता जनाउनेछन्।
जलवायु परिवर्तनसम्बन्धी विश्वव्यापी संवाद र सहकार्यलाई अघि बढाउने उद्देश्यले आयोजना हुने कार्यक्रममा नेपालको सहभागितामार्फत जलवायु परिवर्तनका असर, जलवायु न्याय तथा हिमाली राष्ट्रका सरोकारका विषय अन्तर्राष्ट्रिय मञ्चमा उठाउने अवसर प्राप्त हुने मन्त्रालयले जनाएको छ।
फिजीको कार्यक्रम सकेपछि मन्त्री खनाल अस्ट्रेलिया जानेछन्। अस्ट्रेलिया भ्रमणका क्रममा उनले २२ असोजमा अस्ट्रेलियाकी विदेशमन्त्री पेनी वङसँग द्विपक्षीय भेटवार्ता गर्ने कार्यक्रम छ।
भेटवार्तामा नेपाल–अस्ट्रेलिया सम्बन्ध, द्विपक्षीय सहकार्य तथा आपसी हितका विविध विषयमा छलफल हुने अपेक्षा गरिएको मन्त्रालयले जनाएको छ।
अस्ट्रेलिया भ्रमणका क्रममा मन्त्री खनालले क्यानबेरास्थित नेपाली दूतावास र सिड्नीस्थित नेपाली डायस्पोराले आयोजना गर्ने छुट्टाछुट्टै कार्यक्रममा पनि सहभागिता जनाउनेछन्। ती कार्यक्रममा उनले अस्ट्रेलियामा रहेका नेपाली समुदायसँग अन्तरक्रिया गर्ने कार्यक्रम रहेको मन्त्रालयले जनाएको छ।
