काठमाडौं । नेपाल आयल निगमले पेट्रोलियम पदार्थको मूल्य तत्काल समायोजन नगरी हालकै दरलाई निरन्तरता दिने निर्णय गरेको छ। अन्तर्राष्ट्रिय बजारमा पेट्रोलियम पदार्थको मूल्य बढेर आए पनि भोटेकोशी क्षेत्रमा आएको विपद्लाई मध्यनजर गर्दै उपभोक्तामाथि थप भार नपर्ने गरी मूल्य यथावत् राखिएको निगमले जनाएको छ।
निगमका अनुसार भारतबाट असोज १४ गते प्राप्त नयाँ मूल्यसूचीअनुसार पेट्रोलको खरिद मूल्य प्रतिलिटर २० रुपैयाँ ४४ पैसा, डिजेलको २० रुपैयाँ २१ पैसा र मट्टितेलको १५ रुपैयाँ ९६ पैसा बढेर आएको छ। यस्तै, हवाई इन्धनको मूल्य पनि प्रतिलिटर १८ रुपैयाँ ६६ पैसा वृद्धि भएर आएको निगमले जनाएको छ।
नयाँ मूल्यसूचीअनुसार पेट्रोलियम पदार्थको लागत बढे पनि उपभोक्ताका लागि हाल कायम मूल्यमा कुनै परिवर्तन गरिएको छैन। पहिलो वर्गमा पेट्रोलको मूल्य प्रतिलिटर १९७ रुपैयाँ ५० पैसा, दोस्रो वर्गमा १९९ रुपैयाँ र तेस्रो वर्गमा २०० रुपैयाँ कायम छ।
त्यसैगरी डिजेल र मट्टितेलको मूल्य पनि यसअघिकै दरमा यथावत् राखिएको छ। खाना पकाउने एलपी ग्यासको मूल्य प्रतिसिलिन्डर २ हजार ६० रुपैयाँ नै कायम रहेको निगमले जनाएको छ।
अन्तर्राष्ट्रिय बजारमा बढेको मूल्यअनुसार नेपालमा पेट्रोलियम पदार्थको मूल्य समायोजन नगर्दा निगमलाई पाक्षिक रूपमा ३ अर्ब २० करोड ३८ लाख रुपैयाँ घाटा हुने निगमको अनुमान छ।
