काठमाडौँ। नेपाली कांग्रेसको १५औँ महाधिवेशनलाई लक्षित गर्दै नेपाल विद्यार्थी संघ (नेविसंघ)ले सामाजिक सञ्जालमा आधारित सिर्जनात्मक भिडियो प्रतियोगिता आयोजना गर्ने भएको छ।
‘महाधिवेशन कन्टेन्ट कम्पिटिसन’ नाम दिइएको प्रतियोगितामा कांग्रेसको इतिहास, महाधिवेशन र समसामयिक राजनीतिक विषय समेटेर मौलिक भिडियो बनाउनुपर्नेछ। भिडियो फेसबुक, टिकटक, इन्स्टाग्रामलगायत डिजिटल प्लेटफर्ममा पोस्ट गर्नुपर्ने नेविसंघले जनाएको छ।
प्रतियोगितामा १५ जना विजेता छनोट गरिनेछन्। प्रथम हुनेले ५० हजार, दोस्रोले ३० हजार र तेस्रोले २० हजार रुपैयाँ पाउनेछन्। उत्कृष्ट १२ जनालाई जनही १० हजार रुपैयाँ सान्त्वना पुरस्कार प्रदान गरिनेछ। प्रतियोगिताका लागि कुल २ लाख २० हजार रुपैयाँ पुरस्कार छुट्याइएको छ।
सहभागीले एकल, समूह वा परिवारसँग मिलेर नृत्य, लिप्सिङ्क, अभिनय, कथावाचनलगायत जुनसुकै सिर्जनात्मक शैलीमा भिडियो बनाउन सक्नेछन्। भिडियोको विषयवस्तु, सिर्जनशीलता र प्रस्तुति शैलीसँगै सामाजिक सञ्जालमा प्राप्त लाइक, कमेन्ट र सेयरका आधारमा मूल्यांकन गरिने नेविसंघले जनाएको छ।
नेविसंघकी अध्यक्ष करुणा कटुवालका अनुसार कृत्रिम रूपमा ‘बुस्ट’ वा ‘प्रमोट’ गरिएका भिडियो प्रतियोगितामा समावेश गरिने छैन। सहभागीले भिडियो पोस्ट गर्दा कांग्रेसको आधिकारिक सामाजिक सञ्जाल खाता फलो र मेन्सन गरी तोकिएका ह्यासट्याग प्रयोग गर्नुपर्नेछ।
महाधिवेशनलाई डिजिटल पुस्ता र युवासँग जोड्दै उनीहरूको सिर्जनात्मक सहभागिता बढाउने उद्देश्यले प्रतियोगिता आयोजना गरिएको नेविसंघले जनाएको छ।
