मनाङ – मनाङको नार्पाभूमि गाउँपालिका–५ स्थित हिम्लुङ हिमालमा गएको हिमपहिरोमा परी हराइरहेकामध्ये थप आठ जनाको शव आज फेला परेको छ। यससँगै हिमपहिरोमा ज्यान गुमाउने आरोहीको सङ्ख्या १५ पुगेको छ।
असोज ११ गते गएको हिमपहिरोमा यसअघि सात जनाको शव फेला परेको थियो। आज बिहान चार तथा दिउँसो थप चार जनाको शव फेला परेको सहायक प्रमुख जिल्ला अधिकारी कृष्णप्रसाद पौडेलले जानकारी दिए।
उहाँका अनुसार हिमपहिरोमा अझै एक जना बेपत्ता छन्। फेला परेका शवमध्ये दुई वटा सदरमुकाम चामे ल्याइएको छ भने छ वटा फूगाउँसम्म ल्याइएको छ।
“रात परिसकेकाले हेलिकप्टर उडान हुन सक्दैन। शुक्रबार अरू शव ल्याउँछौँ,” सहायक प्रमुख जिल्ला अधिकारी पौडेलले भने ।
नेपाली सेनाको हेलिकप्टरमार्फत आज शव उद्धार गरिएको हो। हिम्लुङ हिमपहिरोमा हराइरहेकाको खोज तथा उद्धारका लागि नेपाल नेशनल माउन्टेन गाइड एसोसिएशन (एनएनएमजीए)ले ११ सदस्यीय दक्ष टोली परिचालन गरेको छ।
यसैबीच, नेपाली सेनाको टोलीले स्थानीय तथा अन्य सुरक्षा निकायसँगको समन्वयमा चामे गाउँपालिका–४ स्थित ठाडो खोलामा पहिरोका कारण थुनिएको मर्स्याङ्दी नदीको बहाव खुलाउने काम गरिरहेको छ। सेनाले अवरुद्ध विद्युत् प्रसारण लाइन सुचारु गर्नेसमेत काम अघि बढाएको जनाएको छ।
