दमौली (तनहुँ) । तनहुँमा दूध उत्पादनमा संलग्न किसानलाई प्रोत्साहन गर्न भेटेरिनरी अस्पताल तथा पशु सेवा विज्ञ केन्द्रले रु ८० लाखभन्दा बढी अनुदान वितरण गरेको छ ।
केन्द्रले आर्थिक वर्ष २०८२/८३ मा सञ्चालन गरेको उत्पादनमा आधारित प्रोत्साहन कार्यक्रमअन्तर्गत रु ८० लाख ११ हजार अनुदान वितरण गरेको हो । भेटेरिनरी अस्पताल तथा पशु सेवा विज्ञ केन्द्र तनहुँका पशु स्वास्थ्य प्राविधिक रुद्रसिंह ठकुरीका अनुसार जिल्लाका १३ वटा दुग्ध उत्पादक सहकारी संस्थामार्फत किसानलाई उक्त रकम उपलब्ध गराइएको हो ।
कार्यक्रमअन्तर्गत ती सहकारीमार्फत सङ्कलन भएको ३० लाख २० हजार ३२२ लिटर दूधका आधारमा प्रतिलिटर रु तीनका दरले किसानलाई प्रोत्साहन रकम प्रदान गरिएको थियो ।
उत्पादनका आधारमा अनुदान उपलब्ध गराउँदा दूध उत्पादनमा संलग्न किसानलाई व्यावसायिक पशुपालनतर्फ आकर्षित गर्न सहयोग पुगेको ठकुरीले बताए । उनका अनुसार उत्पादनमा आधारित प्रोत्साहन कार्यक्रमले किसानलाई थप दूध उत्पादन गर्न उत्प्रेरित गरेको छ ।
दूध बिक्रीबाट आम्दानी हुनुका साथै उत्पादनका आधारमा अतिरिक्त प्रोत्साहन रकमसमेत प्राप्त हुने भएपछि किसानमा पशुपालन व्यवसायप्रति थप आकर्षण बढेको ठकुरीको भनाइ छ ।
