काठमाडौँ । देशभरका प्रतिभाशाली तथा उदीयमान युवा खेलाडीलाई राष्ट्रिय स्तरमा स्थापित गर्ने उद्देश्यले ‘एशियन पेन्ट्स च्याम्पियनसिप अन्तरविद्यालय यू–१८ छात्र तथा छात्रा राष्ट्रिय फुटबल प्रतियोगिता २०२६’ आयोजना हुने भएको छ।
हिमालयन डाइलगले बुधबार काठमाडौँमा पत्रकार सम्मेलन गर्दै प्रतियोगिताको प्रदेशस्तरीय छनोट खेल भदौ २५ गतेदेखि सातै प्रदेशमा एकसाथ सुरु हुने जानकारी दिएको हो। राष्ट्रिय खेलकुद परिषद् (राखेप)को स्वीकृतिमा आयोजना हुने प्रतियोगितामा देशभरका ३०० भन्दा बढी विद्यालय सहभागी हुने आयोजकले जनाएको छ।
प्रतियोगिताका लागि सातै प्रदेशका १४ वटा प्रमुख खेलमैदान तथा विद्यालयका फुटबल मैदान प्रयोग गरिनेछन्।
सातै प्रदेशमा छनोट
प्रतियोगिताको पहिलो चरणअन्तर्गत प्रदेशस्तरीय छनोट खेल भदौ २५ गतेदेखि सञ्चालन हुनेछन्।
कोशी प्रदेश: विराटनगर र इटहरीमा छात्रतर्फ
मधेश प्रदेश: लालबन्दी र सिमरामा छात्र तथा रौतहटमा छात्रातर्फ
बागमती प्रदेश: चितवनमा छात्र तथा काठमाडौँमा छात्र–छात्रा
गण्डकी प्रदेश: पोखरामा छात्र तथा गोर्खामा छात्रातर्फ
लुम्बिनी प्रदेश: घोराही र नेपालगन्जमा छात्र तथा बुटवलमा छात्रातर्फ
सुदूरपश्चिम प्रदेश: धनगढीमा छात्र–छात्रा
प्रदेशस्तरीय प्रतिस्पर्धाबाट प्रत्येक प्रदेशबाट छात्रतर्फ ६ र छात्रातर्फ ६ टोली गरी कुल १२ टोली राष्ट्रिय च्याम्पियनसिपका लागि छनोट हुनेछन्।
राष्ट्रिय च्याम्पियनसिपको समूह चरणबाट छात्र र छात्रातर्फ समान २–२ शीर्ष टोली फाइनलका लागि छनोट हुनेछन्। फाइनल खेल असोज १६ गते (२ अक्टोबर २०२६) काठमाडौँमा आयोजना गरिने आयोजकले जनाएको छ।
प्रतियोगिताको कुल पुरस्कार राशि १६ लाख रुपैयाँभन्दा बढी रहेको छ। प्रतियोगिताका लागि विशेष आकर्षक ट्रफीसमेत तयार गरिएको छ। प्रतियोगिता संयोजक महेश विष्टका अनुसार ‘ट्रफी टुर’ अभियानअन्तर्गत नेपालगन्ज र धनगढीमा ट्रफी प्रदर्शन भइसकेको छ भने पोखरा र विराटनगरमा असोज ३० र ३१ गते ट्रफी टुर सञ्चालन गरिनेछ।
युवा खेलाडीलाई प्रतिस्पर्धाको अवसर प्रदान गर्नुका साथै प्रतियोगितालाई वातावरण संरक्षणसँग जोड्न ‘एक गोल, एक रुख’ अभियानसमेत सञ्चालन गरिने भएको छ। प्रतियोगितामा प्रहार हुने प्रत्येक गोल बराबर एउटा बिरुवा रोप्ने कार्यक्रम राखिएको आयोजकले जनाएको छ।
