काठमाडौं। काठमाडौं उपत्यकाको फोहोर व्यवस्थापनबारे शुक्रबार सिंहदरबारमा भएको छलफलमा सत्तारूढ राष्ट्रिय स्वतन्त्र पार्टी (रास्वपा)की सांसद आशिका तामाङ र उपत्यकाका स्थानीय तहका प्रमुख तथा प्रतिनिधिबीच चर्काचर्की भएको छ।
सूचना तथा सञ्चारमन्त्री डा. विक्रम तिमिल्सनाले बञ्चरेडाँडामा फोहोर व्यवस्थापन गर्दै आएका स्थानीय तहका प्रमुख तथा प्रतिनिधिसँग छलफल आयोजना गरेका थिए। बैठकमा तामाङले फोहोर व्यवस्थापनबाट प्रभावित स्थानीय तहका प्रमुख उपस्थित नभएको र उपस्थित प्रतिनिधिसमेत घर जान हतारिएको टिप्पणी गरेपछि विवाद सुरु भएको थियो।
ललितपुर महानगरपालिकाका प्रमुख चिरिबाबु महर्जनले तामाङको शैली आक्रामक भएको भन्दै आपत्ति जनाए। स्थानीय तहलाई दोष दिनुभन्दा फोहोर व्यवस्थापनको इतिहास अध्ययन गर्न उनले तामाङलाई आग्रह गरे।
‘हेर्नुस्, तपाईंको कुरा धेरै आक्रामक छ, यसरी हुँदैन । कुरा गर्दाखेरि फोहोरमैला व्यवस्थापनको इतिहास पनि स्टडी गर्नुपर्छ,’ महर्जनले भने।
त्यसपछि तामाङले ‘छलफल यहाँ नभई बञ्चरेडाँडामा हुन्छ’ भन्दै टेबल ठोकेकी थिइन्। विवाद बढेपछि उनी छलफल कक्षबाट बाहिरिएकी थिइन्।
तामाङ बाहिरिएपछि स्थानीय तहका प्रमुखहरूले बैठकको संयोजन प्रभावकारी हुन नसकेको गुनासो गरेका थिए। उनीहरूले आगामी दिनमा छलफलको संयोजन प्रभावकारी बनाउन मन्त्री तिमिल्सनाको ध्यानाकर्षण गराएका थिए।
