काठमाडौं। पुरुष भलिबलको पहिलो फ्रेन्चाइज लिग नेपाल भलिबल लिग (एनभिएल)लाई एक्सट्रिम इनर्जीले तीन वर्षका लागि पौने तीन करोड रुपैयाँको मुख्य प्रायोजन गरेको छ।
बुधबार आयोजित कार्यक्रममा एक्सट्रिम इनर्जीलाई लिगको मुख्य प्रायोजक घोषणा गरिएको हो। एक्सट्रिम इनर्जीकी बिजनेस हेड सोनिया राणा र एनभिएलका प्रबन्ध निर्देशक अश्विन केडियाले सम्झौतापत्रमा हस्ताक्षर गरे। एनभिएलका सीईओ सन्तोष उपाध्यायले सम्झौता रकम पौने तीन करोड रुपैयाँ रहेको बताए।
नेपाल भलिबल संघका उपाध्यक्ष भरत शाहले फ्रेन्चाइज लिगले नेपाली पुरुष भलिबलको विकासमा महत्वपूर्ण योगदान पुर्याउने बताए।
लिगको पहिलो संस्करण भदौ १९ देखि २७ गतेसम्म त्रिपुरेश्वरस्थित राष्ट्रिय खेलकुद परिषद्को कभर्डहलमा हुनेछ। यसअघि भदौ ४ देखि १३ गतेसम्म आयोजना गर्ने तयारी भए पनि कभर्डहल उपलब्ध नहुने भएपछि मिति सारिएको आयोजकले जनाएको छ।
प्रतियोगितामा खप्तड फाल्कन्स, मधेश वारियर्स, सगरमाथा स्म्यासर्स, काठमाडौं रेड्स, अन्नपूर्ण स्पाइकर्स किंग्स र कर्णाली शिवराज गरी ६ टोली सहभागी हुनेछन्। घरेलु खेलाडीको अक्सनबाट यी टोलीले ४२ खेलाडी अनुबन्ध गरिसकेका छन्।
प्रत्येक टोलीले तीन विदेशी खेलाडी अनुबन्ध गर्नेछ भने एक खेलाडी ट्यालेन्ट हन्टमार्फत छनोट गर्नुपर्नेछ। नेपाल भलिबल संघको प्राविधिक सहयोगमा हुने लिगका लागि संघ र केडिया ग्रुपबीच २०८१ जेठमा सम्झौता भएको थियो। विभिन्न कारणले प्रतियोगिता निर्धारित समयमा हुन सकेको थिएन।
