ललितपुर । नेपाली कांग्रेसका सभापति गगनकुमार थापाले जलवायु परिवर्तनलाई नेपालको विकासको मूल एजेन्डाका रूपमा स्थापित गर्नुपर्ने बताएका छन् । विकासलाई सामाजिक न्याय, मानव कल्याण, नैतिक जिम्मेवारी र दिगोपनसँग जोड्न नसके त्यसको कुनै अर्थ नहुने उनको भनाइ छ।
वीपी कोइरालाको स्मृति दिवसका अवसरमा बुधबार ललितपुरमा आयोजित ‘जलवायु परिवर्तन र वीपीको विचार’ विषयक छलफल कार्यक्रममा थापाले वीपी कोइरालाका विचार र अभ्यास आजको जलवायु संकटका सन्दर्भमा पनि उत्तिकै सान्दर्भिक रहेको बताए ।
उनले वीपीले ‘समावेशी’ शब्द प्रयोग नगरे पनि व्यवहारमै त्यसको सफल अभ्यास गरेको उल्लेख गरे । महिलालाई मन्त्रिपरिषद्मा सहभागी गराउने, दलित समुदायका प्रतिनिधिलाई पार्टीको महामन्त्री बनाउने तथा विभिन्न जातजाति र भाषाभाषीको सहभागितामा संसद् र मन्त्रिपरिषद् गठन गरेर वीपीले समावेशी लोकतन्त्रको बलियो आधार निर्माण गरेको उनले बताए ।
विकासका नाममा सामाजिक न्याय, मानव कल्याण, नैतिक उत्तरदायित्व, दूरदर्शिता र दिगोपनलाई बेवास्ता गर्न नहुने उल्लेख गर्दै थापाले धेरै वर्षअघि नै वीपीले वनको राष्ट्रियकरण र प्राकृतिक स्रोतमाथि न्यायपूर्ण पहुँचको विषय उठाएको स्मरण गरे । ती दूरदर्शी विचार अहिलेको जलवायु संकट र दिगो विकासका सन्दर्भमा अझ सान्दर्भिक बनेको उनको भनाइ थियो ।
थापाले नेपाली कांग्रेस भविष्यप्रति आशावादी रहे पनि भविष्यको मार्ग तय गर्न विगतबाट सिक्नुपर्ने आवश्यकता औँल्याए । अग्रज नेताहरूका विचार र निर्णयबाट सिक्दै जलवायु परिवर्तनलाई विकासको मूल प्रवाहमा जोड्ने प्रतिबद्धता पार्टीको रहेको उनले बताए ।
कार्यक्रमबाट प्राप्त सुझाव र अनुभवलाई पार्टीले नीतिगत तहमा उपयोग गर्दै आगामी दिनमा व्यवहारमा समेत कार्यान्वयन गर्दै लैजाने थापाले बताए।
