नयाँ दिल्ली । दिल्लीमा ककरोच जनता पार्टी (सीजेपी) को ‘चलो संसद’ मार्चका क्रममा प्रदर्शनकारीहरूले संसद भवन वरपरको उच्च सुरक्षा घेरा तोड्ने प्रयास गरेपछि सोमबार मध्य दिल्ली तनावग्रस्त बनेको छ। सुरक्षा बलले भीड नियन्त्रणका लागि अश्रुग्याँस प्रहार, लाठीचार्ज तथा दङ्गा नियन्त्रणका सवारी साधन प्रयोग गरेको थियो।
संसदको मनसुन अधिवेशन सुरु भएकै दिन आयोजना गरिएको विरोध प्रदर्शनका क्रममा प्रदर्शनकारी र सुरक्षाकर्मीबीच पटक–पटक झडप भएको थियो। यसलाई नियन्त्रण गर्न राष्ट्रिय राजधानीमा हालका महिनामध्येकै सबैभन्दा ठूलो सुरक्षा व्यवस्था परिचालन गरिएको थियो।
प्रारम्भिक झडप जन्तर मन्तर क्षेत्रमा सुरु भएको थियो। संसदतर्फ अघि बढ्ने प्रयासमा प्रदर्शनकारीहरूले प्रहरीका ब्यारिकेड तोडेपछि अवस्था तनावपूर्ण बनेको थियो। आन्दोलन चर्किंदै जाँदा प्रदर्शनकारीहरूले संसद नजिकको बहु–स्तरीय सुरक्षा घेरा धकेल्ने प्रयास गरेका थिए। झडपका क्रममा केही प्रदर्शनकारी र प्रहरी कर्मचारी सामान्य घाइते भएको जनाइएको छ।
हजारौँ प्रदर्शनकारी मध्य दिल्लीमा भेला भएपछि जन्तर मन्तर, कन्स्टिच्युसन क्लब, रेल भवन, शास्त्री भवन, जनपथ, कनट प्लेस तथा रिजर्भ बैंक अफ इन्डिया (आरबीआई) आसपासका क्षेत्रमा पनि झडप भएका थिए। शास्त्री भवन नजिक प्रदर्शनकारीहरूले ब्यारिकेड तोडेर संसद मार्चमा सहभागी हुन खोजेपछि सुरक्षाकर्मीले अश्रुग्याँस प्रहार गरेका थिए।
संसदभित्र मनसुन अधिवेशन सञ्चालन भइरहेकाले संसद परिसरको सुरक्षालाई अत्यन्त कडा बनाइएको थियो। संसदसँगै रहेको रेल भवन क्षेत्रमा दिल्ली प्रहरी र अर्धसैनिक बलको ठूलो टोली परिचालन गरिएको थियो। प्रदर्शनकारीहरूलाई संसदतर्फ बढ्न नदिन सुरक्षाकर्मीले अश्रुग्याँस प्रहार गरेपछि भीड नियन्त्रणका लागि लाठीचार्जसमेत गरिएको थियो।
कन्स्टिच्युसन क्लब नजिक पनि संसदतर्फ अघि बढ्न खोज्ने प्रदर्शनकारीमाथि सुरक्षाकर्मीले लाठीचार्ज र अश्रुग्याँस प्रयोग गरेका थिए। त्यस्तै, सीजेपीका अर्को समूहले आरबीआई नजिक नाराबाजी गरेपछि सुरक्षाकर्मीले हल्का बल प्रयोग गर्दै उनीहरूलाई प्रतिबन्धित क्षेत्रमा प्रवेश गर्नबाट रोकेका थिए।
आन्दोलन जन्तर मन्तरबाट बाहिर फैलिँदै कनट प्लेससम्म पुगेपछि प्रशासनले उक्त क्षेत्रमा सुरक्षा व्यवस्था थप कडा पारेको थियो। प्रदर्शनकारी बोकेका बस तथा अन्य सवारी साधन रोकिनुका साथै आउटर सर्कल क्षेत्रमा ट्राफिक पूर्ण रूपमा प्रभावित भएको थियो।
सुरक्षाका कारण नयाँ दिल्ली जिल्लाका धेरै मेट्रो स्टेशनका केही प्रवेशद्वार अस्थायी रूपमा बन्द गरिएका थिए, जसले गर्दा धेरै यात्रु प्रभावित भएका थिए। संसद परिसर र सेन्ट्रल भिस्टा करिडोरलाई पूर्ण रूपमा ‘नो–मुभमेन्ट जोन’ घोषणा गर्दै सर्वसाधारणको आवतजावत तथा सवारी सञ्चालनमा रोक लगाइएको थियो। प्रदर्शनकारीहरूले आन्दोलनस्थल वरपर इन्टरनेट तथा मोबाइल सेवा अवरुद्ध गर्न सिग्नल ज्यामर प्रयोग गरिएको आरोप लगाए पनि यसको आधिकारिक पुष्टि हुन सकेको छैन।
सीजेपीले ‘नीट’ परीक्षामा भएको भनिएको अनियमितताको विरोध, शिक्षा क्षेत्रमा सुधार तथा केन्द्रीय शिक्षा मन्त्री धर्मेन्द्र प्रधानको राजीनामाको माग गर्दै जन्तर मन्तरदेखि संसदसम्म ‘चलो संसद’ मार्च आयोजना गरेको थियो।
प्रदर्शनलाई मध्यनजर गर्दै दिल्ली प्रहरीले नयाँ दिल्ली जिल्लाभर पाँच हजारभन्दा बढी प्रहरी तथा अर्धसैनिक बल परिचालन गरेको थियो। महिला सुरक्षाकर्मीसहित सेन्ट्रल आर्म्ड पुलिस फोर्सका २५ भन्दा बढी बटालियन रणनीतिक स्थानमा तैनाथ गरिएको थियो। नयाँ दिल्ली जिल्लालाई १५ सुरक्षा क्षेत्रमा विभाजन गरी वरिष्ठ अधिकारीहरूको प्रत्यक्ष निगरानीमा सुरक्षा व्यवस्था सञ्चालन गरिएको थियो।
यसैबीच, सीजेपी नेतृत्वले आन्दोलनकारीसँग वार्ता गर्न केन्द्र सरकार सहमत भएको र मागबारे छलफलका लागि बैठकको प्रस्ताव गरिएको दाबी गरेको छ। तर, यस विषयमा केन्द्र सरकारका तर्फबाट हालसम्म कुनै आधिकारिक पुष्टि भएको छैन।
