एजेन्सी – अमेरिकी राष्ट्रपति डोनाल्ड ट्रम्पले हर्मुज जलघाँटी हुँदै सञ्चालन हुने अन्तर्राष्ट्रिय समुद्री यातायातको सुरक्षा सुनिश्चित गर्न अमेरिकाले खेलेको भूमिकाबापत खाडी राष्ट्रहरूले आर्थिक योगदान गर्नुपर्ने बताएका छन्। साथै, हालै गरिएको अमेरिकी सैन्य कारबाहीपछि इरानको सैन्य क्षमता उल्लेखनीय रूपमा कमजोर बनेको दाबी पनि उनले गरेका छन्।
ओभल अफिसमा पत्रकारहरूसँग कुरा गर्दै ट्रम्पले हर्मुज जलघाँटी विश्वकै सबैभन्दा संवेदनशील र रणनीतिक समुद्री मार्गमध्ये एक भएको उल्लेख गरे। उक्त मार्गको सुरक्षाका लागि अमेरिकाले ठूलो जिम्मेवारी वहन गरिरहेको भन्दै त्यसबाट प्रत्यक्ष लाभ उठाउने खाडी मुलुकहरूले अमेरिकालाई आर्थिक प्रतिफल उपलब्ध गराउनुपर्ने उनको भनाइ थियो।
त्यसपछि न्युजम्याक्ससँगको अन्तर्वार्तामा ट्रम्पले हालैको अमेरिकी सैन्य कारबाहीले इरानको सैन्य संरचनामा गम्भीर क्षति पुर्याएको दाबी गरे। उनका अनुसार इरानको नौसैनिक शक्ति, हवाई क्षमता, राडार प्रणाली, हवाई प्रतिरक्षा संयन्त्र तथा हतियार उत्पादन गर्ने पूर्वाधारमा ठूलो असर परेको छ।
ट्रम्पले इरानसँग रहेका १५९ वटा नौसैनिक जहाजमध्ये अधिकांश नष्ट भएको र ती अहिले समुद्रको सतहमुनि पुगेको दाबी गरे। साथै, करिब २०० वटा सैन्य विमान ध्वस्त पारिएको, राडार तथा एन्टी–एयरक्राफ्ट प्रणाली निष्क्रिय बनाइएको र हतियार उत्पादन गर्ने क्षमता करिब ८४ प्रतिशतले कमजोर भएको उनको भनाइ थियो।
उनले निरन्तर सैन्य अभियानपछि इरानको आक्रामक क्षमता उल्लेखनीय रूपमा घटेको दाबी गर्दै अहिलेको इरान केही महिनाअघिको अवस्थाभन्दा धेरै कमजोर बनेको बताए। उनका अनुसार इरानसँग अझै केही मिसाइल र सीमित सैन्य क्षमता बाँकी रहे पनि त्यसको प्रभाव पहिलेको तुलनामा निकै कम भइसकेको छ।
इरानलाई मध्यपूर्वमा अस्थिरता फैलाउने प्रमुख स्रोतका रूपमा चित्रण गर्दै ट्रम्पले आफ्नो प्रशासनले तेहरानप्रति कडा नीति कायम राखेको दोहोर्याए। उनले इरानले अमेरिकामाथि दबाब सिर्जना गर्न नसकेको र आफ्नो प्रशासनले त्यस्तो कुनै दबाब स्वीकार नगरेको पनि बताए।
यद्यपि, ट्रम्पले प्रस्तुत गरेका सैन्य क्षतिसम्बन्धी तथ्यांक र दाबीहरू स्वतन्त्र रूपमा पुष्टि भएका छैनन्।
