मस्को । रुसको राजधानी मस्कोमा ‘रोबर्ट’ र ‘माटिल्डा’ नामका दुई ह्युमनोइड रोबोटबीच सांकेतिक विवाह समारोह आयोजना गरिएको छ । आयोजकले यसलाई रुसको पहिलो ह्युमनोइड रोबोट विवाह समारोहका रूपमा प्रस्तुत गरेका छन् ।
पुष्किन पुस्तकालयमा आयोजित समारोहमा दुवै रोबोटले पूर्वनिर्धारित वैवाहिक प्रतिज्ञा साटासाट गरेका थिए । विवाह दर्ता समारोहको शैलीमा आयोजना गरिएको कार्यक्रममा रोबोट कुकुर ‘डोगमाटिक’ले विवाहका ब्रेसलेट मञ्चमा ल्याएको दृश्य सहभागीको आकर्षण बनेको थियो ।
रोबर्टलाई कार्यालय कर्मचारी तथा कन्टेन्ट सिर्जनाकर्ताको भूमिकालाई ध्यानमा राखेर विकास गरिएको छ भने माटिल्डालाई ब्यालेरिनाबाट प्रेरित स्वरूप दिइएको छ । दुवै रोबोट यसअघि सेन्ट पिटर्सबर्ग अन्तर्राष्ट्रिय आर्थिक मञ्चमा सार्वजनिक रूपमा प्रदर्शन गरिएका थिए ।
रोबोट विकासकर्ता कम्पनी ‘आईटी–इम्पेरियल’ का अनुसार कार्यक्रमको उद्देश्य ह्युमनोइड रोबोट प्रविधिको क्षमता र मानिससँगको अन्तरक्रियाको सम्भावना प्रदर्शन गर्नु हो । कम्पनीले स्वचालनसँगै रोबोटको सामाजिक प्रयोगबारे जनचासो बढाउने उद्देश्यले यस्तो कार्यक्रम आयोजना गरिएको जनाएको छ ।
आयोजकका अनुसार यो कानुनी रूपमा मान्यता प्राप्त विवाह होइन । ह्युमनोइड रोबोटले मानव व्यवहार र सामाजिक गतिविधिको कति हदसम्म अनुकरण गर्न सक्छन् भन्ने प्रदर्शनका रूपमा यो कार्यक्रम आयोजना गरिएको हो ।
समारोहका तस्बिर र भिडियो सार्वजनिक भएपछि कार्यक्रमले अन्तर्राष्ट्रिय सञ्चारमाध्यम तथा सामाजिक सञ्जालमा व्यापक चर्चा पाएको छ ।
