काठमाडौं । लोकप्रिय पप गायक, मङ्गोलियन हार्ट ब्यान्डका मुख्य गायक तथा द भ्वाइस अफ नेपाल का निर्णायक राजु लामाले युरोपको सर्वोच्च शिखर माउन्ट एल्ब्रस (५,६४२ मिटर) सफलतापूर्वक आरोहण गरेका छन्।
लामाले सामाजिक सञ्जालमार्फत एल्ब्रस आरोहण आफ्नो ‘सेभेन समिट्स च्यालेन्ज’ अन्तर्गतको तेस्रो सफल अभियान रहेको जानकारी दिएका छन्। पर्वत र प्रकृतिसँग आफ्नो गहिरो भावनात्मक सम्बन्ध रहेको उल्लेख गर्दै उनले शिखरमा पुगेपछि प्राप्त भएको खुसी र गर्वको अनुभूति शब्दमा व्यक्त गर्न कठिन भएको बताएका छन्।
उनका अनुसार सात जना नेपाली आरोहीको टोलीसँग सम्पन्न भएको यो अभियान केवल हिमाल चढ्ने यात्रामा सीमित नभई जलवायु परिवर्तन र विश्वव्यापी तापक्रम वृद्धिबारे जनचेतना फैलाउने उद्देश्यले सञ्चालन गरिएको हो। अभियानमार्फत पृथ्वी संरक्षणका लागि सकारात्मक सन्देश प्रवाह गर्ने लक्ष्य राखिएको उनले बताएका छन्।
यसअघि पनि राजु लामाले जलवायु परिवर्तनका असरबारे विश्व समुदायको ध्यानाकर्षण गराउने उद्देश्यसहित विश्वको सर्वोच्च शिखर सगरमाथाको सफल आरोहण गरेका थिए।
संगीत यात्रासँगै वातावरण संरक्षण, हिमालप्रतिको आफ्नो प्रतिबद्धता र सामाजिक सन्देशलाई निरन्तर अगाडि बढाइरहेका लामाले अहिले ‘सेभेन समिट्स च्यालेन्ज’ अभियानलाई पनि सक्रिय रूपमा अघि बढाइरहेका छन्।
