काठमाडौँ – जिल्ला प्रहरी परिसर काठमाडौँको नेतृत्वमा परिवर्तन भएको छ । करिब नौ महिनासम्म परिसर प्रमुखका रूपमा कार्यरत वरिष्ठ प्रहरी उपरीक्षक (एसएसपी) रमेश थापाले आफ्नो कार्यकाल पूरा गरी जिम्मेवारी हस्तान्तरण गरेका छन्।
उनको स्थानमा सरुवा भई आएका एसएसपी दिलीप घिमिरेले परिसरको नेतृत्व सम्हाल्दै संघीय राजधानीको शान्ति सुरक्षा व्यवस्थापनको जिम्मेवारी ग्रहण गरेका छन्।
एसएसपी थापा गत असोज ५ गते काठमाडौँ प्रहरी प्रमुखका रूपमा पदस्थापन भएका थिए। उनले आफ्नो कार्यकालका क्रममा राजधानीको सुरक्षा व्यवस्थापन, अपराध नियन्त्रण तथा प्रहरी परिचालनसम्बन्धी जिम्मेवारी निर्वाह गरेका थिए।
नयाँ प्रमुखका रूपमा जिम्मेवारी सम्हालेका एसएसपी घिमिरेले अब देशको संघीय राजधानी काठमाडौँको सुरक्षा संयन्त्रको नेतृत्व गर्नेछन्। राजधानीको शान्ति सुरक्षा, कानून कार्यान्वयन तथा सार्वजनिक सुरक्षासम्बन्धी समग्र जिम्मेवारी उनको काँधमा आएको प्रहरी स्रोतले जनाएको छ।
