काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी)ले स्मार्ट टेलिकम प्रा.लि.को सम्पत्ति लिलामी तथा बिक्री प्रक्रियासम्बन्धी अनुसन्धानका क्रममा नेपाल इन्भेष्टमेन्ट मेगा बैंकका प्रमुख कार्यकारी अधिकृत (सीईओ) ज्योति प्रकाश पाण्डेलाई पक्राउ गरेको छ ।
सीआईबी प्रशासन शाखाद्वारा जारी प्रेस विज्ञप्तिअनुसार नेपाल दूरसञ्चार प्राधिकरण जफत तथा व्यवस्थापन समितिले २०७९ पुस १ गते स्मार्ट टेलिकमको सेवा सञ्चालनका लागि जारी गरेको अनुमतिपत्र नवीकरण नगरिएको, अनुमतिपत्र बापतको रकम तथा रोयल्टीसमेत नतिरेको र पटक–पटकको निर्देशन अटेर गरेपछि कम्पनीको दूरसञ्चार सेवा, संरचना, प्रणाली तथा उपकरण नेपाल सरकारको स्वामित्वमा ल्याई सञ्चालन तथा व्यवस्थापन गर्ने निर्णय गरेको थियो ।
विज्ञप्तिअनुसार बीटीएस–०१/मेमो २०७९ नम्बरको निर्णयमार्फत कम्पनीको सम्पूर्ण चल–अचल सम्पत्ति नेपाल सरकारको स्वामित्वमा ल्याई सञ्चालन तथा व्यवस्थापन गर्ने प्रक्रिया अघि बढाइएको थियो । त्यसक्रममा २०७९ फागुन २ गते कम्पनीको सम्पूर्ण सम्पत्ति, दूरसञ्चार पूर्वाधार, संरचना, प्रणाली तथा टावर नेपाल दूरसञ्चार प्राधिकरणले नियन्त्रणमा लिएको थियो ।
सीआईबीले सरकारी हक–हित संरक्षण गर्ने उद्देश्यले गठित ‘लिक्विडेसन रिकभरी कमिटी’ (एलआरसी)का अध्यक्षसमेत रहेका पाण्डेमाथि उक्त सम्पत्ति लिलामी प्रक्रियामा संलग्न रही गैरकानुनी लाभ पुर्याउने कार्य गरेको आरोप लगाएको छ ।
प्रहरीका अनुसार काठमाडौँको रक्तकाली स्थायी ठेगाना भई हाल ललितपुरको मानभवन बस्दै आएका ६३ वर्षीय पाण्डेलाई सिन्धुलीको कमलामाई नगरपालिका–६ बसपार्कबाट वैशाख २९ गते राति करिब ८ बजे पक्राउ गरिएको हो । उनलाई जिल्ला प्रहरी कार्यालय सिन्धुली तथा इलाका प्रहरी कार्यालय भिमानको सहयोगमा नियन्त्रणमा लिइएको सीआईबीले जनाएको छ ।
सीआईबीका अनुसार नेपाल इन्भेष्टमेन्ट मेगा बैंकले २०८१ वैशाख १० गते निकालेको सूचनाको आधारमा स्मार्ट टेलिकमसँग सम्बन्धित विभिन्न उपकरण, टावर तथा दूरसञ्चार सामग्री लिलामी बिक्री गरिएको थियो । तर, लिलामी प्रक्रियामा प्रयोग भएका उपकरणहरूको लागत, मूल्यांकन तथा बिक्रीसम्बन्धी विवरणमा अनियमितता देखिएको र “नभएको उल्लेख गरी भएको तथा भएकोलाई नभएको देखाउने” लगायतका कार्यमार्फत सरकारी सम्पत्तिमा हानि पुर्याइएको आशंकामा अनुसन्धान अघि बढाइएको हो ।
पाण्डेविरुद्ध मुलुकी अपराध संहिताअन्तर्गत ठगी, आपराधिक विश्वासघात तथा सरकारी सम्पत्तिसम्बन्धी कसुरमा अनुसन्धान भइरहेको सीआईबीले जनाएको छ ।
