पोखरामा प्याराग्लाइडिङ दुर्घटना पर्दा सोमबार एकजनाको मृत्यु भएको छ। दुर्घटनामा परि अर्का एकजना घाइते भएका छन्। प्रहरीका अनुसार सोमबार दिउँसो १ बजे भएको उक्त दुर्घटनामा परेर प्याराग्लाइडिङ पाइलट ३८ वर्षीय राजु गैरे नेपालीको मृत्यु भएको हो।
पोखरा महानगरपालिका–१८ को सराङकोटबाट उडेको फिस्टेल कम्पनीको प्याराग्लाइडिङ दुर्घटनामा परेको हो। दुर्घटनामा परेर प्याराग्लाइडिङमा उडिरहेकी काठमाडौं बुढानिलकण्ठ नगरपालिका–२ वासीकुकी २८ वर्षीया शिला श्रेष्ठ घाइते भएकी छिन्। उनको अवस्था गम्भीर रहेको कास्कीका प्रहरी प्रवक्ता डिएसपी सुवास हमालले जानकारी दिए। घाइते श्रेष्ठलाई थप उपचारका लागि काठमाडौं पठाइएको छ।
डिएसपी हमालका अनुसार प्याराग्लाइडिङ अवतरणका लागि फेवाताल किनारको क्षेत्र तोकिएको भएपनि त्यो ठाउँमा झर्न नपाउँदै दुर्घटना भएको थियो। ‘फेवाताल किनारको खपौदी क्षेत्रमा अवतरण गर्नुपर्ने हो। तर, त्यो भन्दा झन्डै डेढ किलोमिटर माथि (पोखरा–१८ क्याम्प चोकमा) मा दुर्घटना भएको हो,’ हमालले भने, ‘अवतरणस्थलमै सहजै आउन सकेनन्। तोकिएको ठाउँमा झर्नै नपाई दुर्घटना भएको छ। दुर्घटनाको कारण खुलेको छैन।’
दुर्घटनामा ज्यान गुमाएका पाइलट कास्कीको पोखरा महानगरपालिका–२८ का हुन्। उनी पोखरा–६ लेकसाइड बस्दै आएका थिए। दुर्घटनालगत्तै घाइते भएका पाइलट राजुलाई उपचारका लागि मेट्रोसिटि अस्पताल पठाइएकोमा चिकित्सकले मृत घोषणा गरेको प्रहरीको भनाई छ।