काठमाडौं । बालिकामाथि श्रमशोषण गरेको आरोपमा लुम्बिनी प्रदेशसभा सदस्य रेखा शर्मा पक्राउ परेकी छन् । जिल्ला अदालत काठमाडौंले उनलाई तीन दिन हिरासतमा राखेर थप अनुसन्धान गर्न अनुमति दिएको छ ।
न्यायाधीश नवराज दुलालको इजलासले उक्त आदेश दिएको हो । उनलाई काठमाडौं उपत्यका अपराध अनुसन्धान कार्यालयको टोलीले धुम्बाराहीबाट गएराति नियन्त्रणमा लिएको थियो । पक्राउपछि उनलाई सरकारी वकिलको कार्यालयमार्फत जिल्ला अदालत काठमाडौं उपस्थित गराइएको हो ।
यसअघि काठमाडौं महानगरपालिकाले २०८१ जेठ १४ गते शर्माको घरबाट एक नाबालिकाको उद्धार गरेको थियो । ती बालिकालाई घरेलु कामदारका रूपमा राखेर दुर्व्यवहार गरिएको आरोप लागेको थियो । उक्त घटनापछि त्यतिबेला महानगरका मेयर रहेका हालका प्रधानमन्त्री बालेन शाहले पनि विषयप्रति चासो व्यक्त गरेका थिए ।
घटनासम्बन्धी जिल्ला प्रहरी परिसर काठमाडौंमा उजुरी दर्ता भएको थियो । तर उजुरी दिएको दुई महिना बित्दासमेत पक्राउ नपरेको भन्दै व्यापक आलोचना भएको थियो । यसअघि २०८१ माघको अन्तिम साता महान्यायाधिवक्ता कार्यालयले शर्माविरुद्ध मुद्दा नचलाउने निर्णय गरेको थियो ।
