काठमाडौं । राष्ट्रिय प्रजातन्त्र पार्टी राप्रपाको नयाँ नेतृत्वका लागि भएको निर्वाचनको मतगणना जारी छ ।
अध्यक्षका लागि भएको मतदानको मत गणनामा राजेन्द्र लिङ्देनको अग्रता कायमै रहेका छ ।
एकता महाधिवेशनबाट भएको हुन लागेको नयाँ नेतृत्वमा अध्यक्षका लागि राजेन्द्र लिङ्देन र कमल थापाको कडा प्रतिस्पर्धा भइरहेको छ । हालसम्मको अवस्था हेर्दा लिङ्देनले १३७१ र कमल थापाले ११५४ मत पाएका छन् ।
अब ९०९ मत मात्रै गन्न बाँकी रहेको छ । मतगणनाको सुरुमा राजेन्द्रले झिनो मतअन्तर प्राप्त गरिरहेपनि अहिले उनले फराकिलो मतान्तर बनाएका छन् ।
निर्वाचन समितिका सह सदस्य सचिव झनक प्याकुरेलले ३९ सय १७ मत खसेको जानकारी दिए । उनकाअनुसार ४३ सय ८० मतदाता रहेकोमा ५ सयभन्दा बढी अनुपस्थित भएका छन् । प्रदेशअनुसार प्रदेश १ बाट ७७६, प्रदेश २ बाट ५७३, बागमतीबाट ८९०, गण्डकीबाट ४०२, लुम्बिनीबाट ५९५, कर्णालीबाट ३०९, सुदूरपश्चिम प्रदेशबाट ३७२ मत खसेको छ ।
अबको केही समयपछि नै राप्रपाले औपचारिक रुपमा नयाँ नेतृत्व पाउने छ ।
राप्रपाको १ सय ९९ सदस्यीय कार्यसमितिमध्ये मतदानबाट अध्यक्षसहित एक सय ४९ सदस्य चुनिने छन् । बाँकी ५० जना अध्यक्षले मनोनित गर्ने राप्रपाको संशोधित विधानमा उल्लेख छ ।
समावेशीसहित १४१ केन्द्रीय सदस्यका लागि २ सय ६४ जनाले उम्मेदवारी दिएका छन् । आठ सदस्यीय पदाधिकारीका लागि १६ जनाको उम्मेदवारी परेको छ । पदाधिकारीमा एक महिलासहित चार उपाध्यक्षका लागि आठ जना र एक महिलासहित तीन महामन्त्रीका लागि ६ जना चुनावी प्रतिस्पर्धामा छन् ।
