काठमाडौं । मलेसियामा जारी एसीसी प्रिमियर कपको सेमिफाइनलमा नेपालले ओमानमाथि ८७ रनको शानदार जित निकाल्दै फाइनलमा स्थान सुरक्षित गरेको छ।
नेपालले दिएको १४८ रनको लक्ष्य पछ्याएको ओमान नेपाली स्पिनरको घातक बलिङसामु टिक्न सकेन। ओमान २८.१ ओभरमा ६० रनमै अलआउट भएपछि नेपालले सहज जित हात पारेको हो।
यसअघि टस हारेर पहिले ब्याटिङ गरेको नेपालले ४५.४ ओभरमा सबै विकेट गुमाउँदै १४७ रन बनाएको थियो। नेपालको इनिङ्समा दीपेन्द्रसिंह ऐरीले सर्वाधिक ५१ रन बनाए भने बसिर अहमदले ४७ रनको महत्वपूर्ण योगदान दिए।
नेपाल २३ रनमै पहिलो विकेट गुमाएर ३६ रनमा चार विकेट गुमाएको संकटपूर्ण अवस्थामा पुगेको थियो। त्यसपछि दीपेन्द्र र बसिरले धैर्यपूर्ण ब्याटिङ गर्दै ९३ रनको महत्वपूर्ण साझेदारी गरे। यही साझेदारीले नेपाललाई सम्मानजनक योगफलतर्फ अघि बढाएको थियो।
नेपालका लागि देव खनालले १३ तथा आसिफ शेखले ११ रन बनाए। अन्य ब्याटरले भने दोहोरो अंकको स्कोर बनाउन सकेनन्। नेपाल १२९ रनमा पाँच विकेटको अवस्थामा रहे पनि त्यसपछि लगातार विकेट गुमाउँदा १४७ रनमै समेटिएको थियो।
ओमानका जय ओडेडराले १० ओभरमा २६ रन खर्चेर तीन विकेट लिए। हस्नैन शाहले ८.४ ओभरमा २८ रन दिँदै तीन विकेट हात पारे। मुहम्मद इमरानले दुई तथा शकील अहमद र मुजिबुर अलीले समान एक विकेट लिए।
तर, ओमानको ब्याटिङ इनिङ्समा नेपाली स्पिनर हावी भए। नियमित अन्तरालमा विकेट गुमाएको ओमान ६० रनमै समेटिएपछि नेपालले ८७ रनको प्रभावशाली जित दर्ता गर्यो।
सेमिफाइनलमा जितसँगै नेपालले एसीसी इमर्जिङ टिम्स एसिया कपमा समेत स्थान बनाएको छ।
अब नेपालले एसीसी प्रिमियर कपको उपाधिका लागि यूएईसँग प्रतिस्पर्धा गर्नेछ। फाइनल खेल शनिबार हुनेछ। फाइनलमा यूएईलाई पराजित गर्न सके नेपालले आगामी एसिया कपमा समेत स्थान बनाउनेछ।
