काठमाडौं। मानिसले भाग्नसमेत नपाउने गरी बाढी बस्तीमा पसेको र घरका छत तथा झाडीमा शव भेटिएको भन्दै नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले विपत्तिबाट भएको क्षति अकल्पनीय रहेको बताएका छन्। उनले तत्काल उद्धार र राहतसँगै प्रभावितको आवास, स्वास्थ्य, शिक्षा र जीविकोपार्जन सुनिश्चित गर्ने दीर्घकालीन पुनर्निर्माण योजना बनाउन सरकारसँग आग्रह गरेका छन्।
रसुवामा आएको बाढीपछिको अवस्था अवलोकन गर्न नुवाकोटको त्रिशूली पुगेका ओलीले प्रभावित क्षेत्रको निरीक्षणपछि सञ्चारकर्मीसँग कुरा गर्दै यसपटकको बाढीको बहाव अस्वाभाविक रहेको बताए।
‘मानिसहरूले भाग्ने समयसमेत नपाउने गरी बस्तीमा बाढी पसेको छ,’ ओलीले भने, ‘झाडी र घरका छतहरूमा शव भेटिनु अत्यन्तै हृदयविदारक छ।’
उनका अनुसार बाढीपहिरोले हजारौँ भौतिक संरचनामा क्षति पुर्याएको छ। अब बाटोघाटो, पुललगायत पूर्वाधार पुनर्निर्माणसँगै पीडितका लागि आवास, स्वास्थ्य, शिक्षा र रोजगारी तथा जीविकोपार्जनका कार्यक्रम अघि बढाउनुपर्ने उनले बताए।
बालबालिकाको पढाइ र बिरामीको नियमित औषधोपचारमा अवरोध हुन नदिन सरकारले विशेष ध्यान दिनुपर्नेमा जोड दिँदै ओलीले राहत र उद्धारको गति अझ बढाउन आग्रह गरे। ‘अहिलेको मुख्य आवश्यकता जनतालाई राहत र भरोसा दिनु हो,’ उनले भने।
उच्च पदस्थ अधिकारीको प्रभावित क्षेत्र भ्रमण औपचारिकतामा मात्र सीमित हुन नहुने भन्दै ओलीले सरकारको प्रभावकारिता पीडितले प्रत्यक्ष अनुभूति गर्नुपर्ने बताए।
राहत तथा उद्धारमा सरकारी निकायलाई थप सक्रिय बनाउनुपर्ने बताउँदै ओलीले एमालेका तर्फबाट पनि राहत तथा सहयोगका कामलाई तीव्रता दिने प्रतिबद्धता जनाए।
