काठमाडौं। भोटेकोशी नदीमा आएको विनाशकारी बाढीमा ज्यान गुमाएकाहरूको शव व्यवस्थापनमा समस्या देखिएपछि काठमाडौंमा समेत जमिनमा गाडेर व्यवस्थापन गर्न थालिएको छ।
देशभरका अस्पतालका शवगृह क्षमताभन्दा बढी शव संकलन भएपछि सरकारले सरकारी वन क्षेत्रमा शव व्यवस्थापन गर्ने निर्णय गरेको हो। स्वास्थ्य मन्त्रालयका अनुसार देशभरका शवगृहमा करिब ६ सय शव मात्र राख्न सक्ने क्षमता छ। तर, हालसम्म करिब एक हजार शव संकलन भइसकेका छन् भने चार हजारभन्दा बढी व्यक्ति अझै सम्पर्कविहीन छन्।
बाढी आएको तेस्रो दिनमै शवगृह भरिएपछि शव कुहिने जोखिम बढेको थियो। यसअघि फिस्लिङदेखि गोलाघाटसम्म संकलन गरिएका पहिचान खुल्न नसकेका शव चितवनमा व्यवस्थापन गरिएको थियो।
अब संकलित शव चितवन, कास्की र काठमाडौंका तोकिएका सरकारी वन क्षेत्रमा गाडेर व्यवस्थापन गर्ने तयारी छ। सनाखत भइसकेका शव कानुनी प्रक्रिया पूरा गरी सम्बन्धित परिवार वा आफन्तको जिम्मा लगाइएको छ।
बेपत्ताको खोजी जारी रहेकाले मृतकको संख्या अझै बढ्न सक्ने सरकारी अधिकारीहरूको अनुमान छ।
