इलाम । सडक डिभिजन कार्यालय इलामले ठेक्का सम्झौता तोडिएका विभिन्न निर्माण व्यवसायीलाई सरकारी बाँकी रकम ३५ दिनभित्र दाखिला गर्न अन्तिम ताकेता गरेको छ।
डिभिजनअन्तर्गत सञ्चालित विभिन्न आयोजनामा करारीय दायित्व पूरा नगरी सम्झौताको गम्भीर उल्लङ्घन गरेको भन्दै ती निर्माण व्यवसायीसँगको ठेक्का सम्झौता रद्द गरिएको थियो। ठेक्का अन्त्यपछि सार्वजनिक खरिद ऐन, २०६३ को दफा ५९(८) तथा सार्वजनिक खरिद सम्झौताबमोजिम कायम भएको सरकारी बाँकी रकम असुल गर्न डिभिजनले पटक–पटक प्रयास गरे पनि हालसम्म रकम दाखिला नभएको जनाएको छ।
आर्थिक कार्यविधि तथा वित्तीय उत्तरदायित्व नियमावली, २०७७ बमोजिम रकम असुलीका लागि बिहीबार सार्वजनिक सूचना जारी गर्दै डिभिजनले सम्बन्धित निर्माण व्यवसायीलाई रकम दाखिला गर्न अन्तिम अवसर दिएको हो।
सूचनाअनुसार ठेक्का रद्द भएका निर्माण व्यवसायीले नेपाल बैंक लिमिटेडमा रहेको नेपाल सरकारको राजस्व खातामा सरकारी बाँकी रकम जम्मा गर्नुपर्नेछ। सूचना प्रकाशित भएको मितिले ३५ दिनभित्र राजस्व खाता नम्बर ००१०१००००००००१००१००१, राजस्व कोड नम्बर १४३१२ र कार्यालय कोड नम्बर ३३७०१०३०१ मा रकम जम्मा गरी बैंक भौचर सडक डिभिजन कार्यालय इलाममा पेस गर्नुपर्नेछ।
डिभिजनका अनुसार रकम दाखिला गर्न बाँकी निर्माण व्यवसायी र रकम यसप्रकार छन्–
बुढाथोकी निर्माण सेवा, पाँचथर – रु २३ लाख ४ हजार ५८७.४५
मावोहाङ निर्माण सेवा, ताप्लेजुङ – रु १ करोड ८ लाख २५ हजार २.६२
शिव शक्ति इन्फ्रा डेभलपर्स प्रा.लि., मकवानपुर – रु ४ करोड ५९ लाख ७१ हजार ५६३.७५
सोही कम्पनीको अर्को ठेक्काको – रु ३ करोड ४२ लाख ४७ हजार ७०८.६८
एम.डि.ब्रो. कन्स्ट्रक्सन प्रा.लि., इलाम – रु ९ लाख ३४ हजार ७५०.०१
शाह/पूजा जे.भी., धनकुटा – रु ८६ लाख ३३ हजार ३१३.७८
सोही जेभीको अर्को ठेक्काको – रु ५७ लाख ३६ हजार ९५९.६७
आशिवर्दि/पूजा जे.भी., धनकुटा – रु १ करोड ७१ लाख ७४ हजार १६३.९२
एबिसि निर्माण सेवा, माईजोगमाई, इलाम – रु १ करोड १८ लाख १३ हजार ३८४.२३
के.एम. कन्स्ट्रक्सन, धनुषा – रु ३६ लाख ८७ हजार ७२६.३६
टेक एण्ड सपना कन्स्ट्रक्सन प्रा.लि., पाँचथर – रु ७९ लाख ४९ हजार २४५.२९
गायत्री माँ कन्स्ट्रक्सन एण्ड समरित कन्स्ट्रक्सन जे.भी., धनुषा – रु १ करोड ९९ लाख १४ हजार ४४७.९९
डिभिजनले तोकिएको समयभित्र रकम दाखिला नगरेमा प्रचलित कानुनबमोजिम थप कारबाही अघि बढाइने जनाएको छ।
