लमजुङ । कलकल बग्ने मर्स्याङ्दी नदी, हरियाली डाँडाकाँडा, हिमाली दृश्य, तातोपानीका कुण्ड तथा धार्मिक, ऐतिहासिक र सांस्कृतिक सम्पदाले लमजुङको मर्स्याङ्दी गाउँपालिकालाई आकर्षक पर्यटकीय गन्तव्यका रूपमा स्थापित गर्ने सम्भावना बढाएको छ ।
गाउँपालिकाका विभिन्न वडामा रहेका प्राकृतिक तथा धार्मिकस्थलमा आन्तरिक पर्यटकको आवागमन बढ्न थालेको छ । वडा नं ४ जगतमा रहेको तातोपानी कुण्ड र वडा नं ६ बाहुनडाँडाको तातोपानी कुण्ड पर्यटकका लागि आकर्षणका केन्द्र बनेका छन् । प्राकृतिक रूपमा निस्कने तातोपानीमा स्नान गर्दा विभिन्न रोग निको हुने जनविश्वाससमेत रहेको छ ।
गाउँपालिकाका विभिन्न डाँडाबाट हिमशृङ्खलासहित आसपासका मनोरम भू–दृश्य अवलोकन गर्न सकिन्छ । वडा नं ३ मा रहेको हर्सिङडाँडा भने प्राकृतिक सौन्दर्यसँगै ऐतिहासिक महत्व बोकेको स्थल हो । राष्ट्रिय विभूति भक्ति थापाले बाल्यकालमा गाईवस्तु चराएको स्थानका रूपमा परिचित हर्सिङडाँडालाई पर्यटनसँग जोडेर विकास गर्न सके थप पर्यटक भित्र्याउन सकिने स्थानीयको विश्वास छ ।
मर्स्याङ्दीको पर्यटन प्राकृतिक सम्पदामा मात्र सीमित छैन । यहाँको मौलिक कला, संस्कृति र परम्पराले पनि पर्यटक आकर्षित गर्ने प्रशस्त सम्भावना बोकेको छ । विभिन्न समुदायले मनाउने चाडपर्व, परम्परागत नाचगान तथा सांस्कृतिक गतिविधिले गाउँपालिकाको पहिचानलाई जीवन्त बनाएका छन् ।
घाँटु, सोरठी, कृष्णचरित्र, बालन, झ्याउरे र तामाङ सेलोलगायतका सांस्कृतिक गतिविधिलाई पर्यटनसँग जोड्न सके स्थानीय कला तथा संस्कृतिको संरक्षणसँगै समुदायको आयआर्जनमा समेत योगदान पुग्ने देखिन्छ ।
मर्स्याङ्दी गाउँपालिकाका विभिन्न वडा अन्नपूर्ण पदमार्ग तथा बेँसीसहर–चामे सडकसँग जोडिएका छन् । यसले मनाङतर्फ जाने आन्तरिक तथा बाह्य पर्यटकलाई स्थानीय पर्यटकीय गन्तव्यतर्फ आकर्षित गर्ने अवसरसमेत सिर्जना गरेको छ । विशेषगरी पर्यटकीय मौसममा अन्नपूर्ण पदमार्ग हुँदै आउने विदेशी पर्यटक तथा मनाङ जाने यात्रुलाई स्थानीय प्राकृतिक, धार्मिक, सांस्कृतिक र ऐतिहासिक स्थलसँग जोड्न सके पर्यटनको लाभ गाउँपालिकाका विभिन्न बस्तीमा पुर्याउन सकिने स्थानीय बताउँछन् ।
स्थानीयवासी पूर्णबहादुर गुरुङका अनुसार मर्स्याङ्दी गाउँपालिका प्राकृतिक, पर्यटकीय र ऐतिहासिक दृष्टिले महत्वपूर्ण क्षेत्र हो । पर्यटकीय सम्भावना भएका स्थानको पहिचान, संरक्षण, प्रचारप्रसार र आवश्यक पूर्वाधार विकासमा ध्यान दिन सके स्थानीय समुदायले पर्यटनबाट प्रत्यक्ष लाभ लिन सक्ने उनको भनाइ छ ।
हर्सिङडाँडाको सम्भावनालाई स्थानीयस्तरबाटै उपयोग गर्ने प्रयाससमेत सुरु भएको छ । भक्ति थापासँग जोडिएको ऐतिहासिक पहिचानलाई आधार बनाएर पर्यटक आकर्षित गर्न आफूले पर्यटनलक्षित व्यवसाय सञ्चालन गरिरहेको गुरुङले बताए । प्राकृतिक सौन्दर्य र ऐतिहासिक महत्वलाई एकैसाथ प्रवर्द्धन गर्न सके हर्सिङडाँडा महत्वपूर्ण पर्यटकीय गन्तव्य बन्न सक्ने उनको विश्वास छ ।
गाउँपालिकामा सडक तथा अन्य पूर्वाधार विस्तार भइरहेकाले पर्यटन विकासका लागि आधारसमेत थप बलियो बन्दै गएको छ । पर्यटकीयस्थलसम्म सहज पहुँच, पदमार्ग, खानेपानी, शौचालय, सरसफाइ, सूचना केन्द्र, सङ्केतचिह्न तथा घरबासजस्ता पूर्वाधार व्यवस्थित गर्न सके पर्यटनले थप गति लिन सक्ने स्थानीयको अपेक्षा छ ।
गाउँपालिका अध्यक्ष अर्जुन गुरुङले मर्स्याङ्दी पर्यटकीय, धार्मिक तथा ऐतिहासिक सम्पदाले भरिपूर्ण क्षेत्र भएकाले तिनको संरक्षण र प्रवर्द्धनलाई प्राथमिकता दिइएको बताए । पर्यटक आकर्षित गर्ने कार्यक्रम, आवश्यक पूर्वाधार निर्माण तथा पर्यटकीयस्थलसम्म यातायात पहुँच विस्तारमा गाउँपालिकाले काम गरिरहेको उनको भनाइ छ ।
“यहाँका सम्पदाको संरक्षणसँगै व्यापक प्रचारप्रसार, आवश्यक पूर्वाधार निर्माण र यातायात पहुँच विस्तार गरी पर्यटक आकर्षित गर्ने वातावरण बनाउन गाउँपालिकाले प्राथमिकताका साथ काम गरिरहेको छ”, अध्यक्ष गुरुङले भने ।
अन्नपूर्ण पदमार्ग र बेँसीसहर–चामे सडकको पहुँचलाई स्थानीय पर्यटकीय गन्तव्यसँग जोड्दै संरक्षण, पूर्वाधार विकास, स्थानीय समुदायको सहभागिता र प्रभावकारी प्रचारप्रसारलाई एकसाथ अघि बढाउन सके मर्स्याङ्दी गाउँपालिका लमजुङकै प्रमुख पर्यटकीय गन्तव्यका रूपमा विकास हुन सक्ने देखिन्छ ।
