गुल्मी । दुई वर्षभित्र निर्माण सम्पन्न गर्ने लक्ष्यसहित सुरु गरिएको गुल्मी अस्पतालको नयाँ भवन पाँच वर्ष पुग्न लाग्दासमेत पूरा हुन सकेको छैन । निर्माणाधीन भवनको निरीक्षणमा पुगेका भौतिक पूर्वाधार तथा यातायात मन्त्री सुनिल लम्सालले ठेक्का रद्द गरी नयाँ टेन्डर आह्वान गरेर काम अघि बढाउन निर्देशन दिएका छन् ।
अनुगमनका क्रममा मन्त्री लम्सालले निर्माण कम्पनी, इन्जिनियर र अस्पताल प्रशासनसँग भवनको भौतिक प्रगति, बाँकी काम तथा निर्माणमा भएको ढिलाइबारे जानकारी लिएका थिए । निर्धारित समयभित्र काम सम्पन्न हुन नसकेकोप्रति असन्तुष्टि जनाउँदै उनले अब थप ढिलाइ स्वीकार्य नहुने बताएका हुन् ।
निर्माणाधीन भवनको भौतिक प्रगति ९१ प्रतिशतभन्दा केही बढी पुगेको छ । अझै करिब ६ करोड रुपैयाँ बराबरको काम बाँकी रहेको बताइएको छ । हाल भवनमा पेन्टिङ, वायरिङ तथा आल्मुनियम जडानलगायतका काम भइरहेका छन् ।
गुल्मी अस्पतालको नयाँ भवन निर्माणका लागि २०७८ असार १८ गते सम्झौता भएको थियो । २०८० असार १७ गतेभित्र निर्माण सम्पन्न गर्ने लक्ष्य राखिए पनि तोकिएको समयमा काम पूरा हुन सकेन । त्यसपछि पटक–पटक म्याद थप हुँदै आएको छ ।
पाँच तले भवन निर्माणको जिम्मा स्वच्छन्द–बानियाँ जेभी, हेटौँडा, मकवानपुरले पाएको हो । भवन निर्माणका लागि २५ करोड ९५ लाख ६४ हजार २०३ रुपैयाँमा ठेक्का सम्झौता भएको थियो । भारत सरकारको आर्थिक सहयोगमा राष्ट्रिय पुनर्निर्माण प्राधिकरणअन्तर्गत आयोजना कार्यान्वयन इकाइ (भवन) मार्फत परियोजनाका लागि बजेट उपलब्ध गराइएको थियो ।
नयाँ भवन निर्माण सम्पन्न नहुँदा गुल्मी अस्पतालले अझै पुरानै भवनबाट सेवा प्रवाह गरिरहेको छ । पर्याप्त वार्ड तथा सेवा विस्तारका लागि आवश्यक पूर्वाधारको अभावमा बिरामी र स्वास्थ्यकर्मी दुवैले समस्या भोग्दै आएका छन् ।
नयाँ भवन सञ्चालनमा आएपछि व्यवस्थित ओपीडी, आपत्कालीन, प्रसूति तथा शल्यक्रिया सेवा, प्रयोगशाला, एक्स–रे र विशेषज्ञ उपचार सेवा विस्तार गर्ने योजना छ । थप शय्याका साथै आईसीयू, सर्जिकल, मेडिकल र बाल उपचारका लागि छुट्टाछुट्टै कक्ष सञ्चालन गर्ने तयारी पनि गरिएको छ ।
अस्पताल विकास समिति अध्यक्ष राजेन्द्र पाण्डेले जिल्लावासीले लामो समयदेखि सुविधासम्पन्न अस्पताल भवनको प्रतीक्षा गरिरहेको भन्दै अब निर्माणमा कुनै पनि हालतमा थप ढिलाइ गर्न नहुने बताए ।
गुल्मी अस्पताल २०७१ सालमै ५० शय्यामा स्तरोन्नति भए पनि आवश्यक भौतिक पूर्वाधारको अभावका कारण स्वीकृत क्षमताअनुसार सेवा विस्तार हुन सकेको छैन ।
