काठमाडौं। प्रतिनिधिसभाअन्तर्गतको पूर्वाधार विकास समितिका सभापति आशिष गजुरेलले ट्राफिक प्रहरीलाई बोलीमा शुद्धता, व्यवहारमा नम्रता र आर्थिक अनुशासन कायम गर्न निर्देशन दिएका छन्। केही ट्राफिक प्रहरीको गलत व्यवहारका कारण समग्र संगठन बदनाम हुन नहुने भन्दै उनले नागरिकबाट ट्राफिक प्रहरीले दुःख दिएको गुनासो सुन्न नपर्ने वातावरण बनाउनुपर्ने बताए।
आइतबार आयोजित ‘ट्राफिक व्यवस्थापनमा राष्ट्रिय तथा अन्तर्राष्ट्रिय अभ्यासहरू’ विषयक अन्तरक्रिया कार्यक्रममा गजुरेलले ट्राफिक नियम उल्लंघन गरेकालाई चिट नकाटी पैसा लिएर छाड्ने गरेको गुनासो आउने गरेको उल्लेख गरे। “बोलीमा शुद्धता, व्यवहारमा नम्रता र आर्थिक अनुशासन हुनुपर्छ,” उनले भने, “यी कुरा पालना गर्न तयार छैन भने यो जागिर उसको लागि होइन।”
ट्राफिक प्रहरीलाई सुरक्षित, प्रविधिमैत्री र आवश्यक सेवा–सुविधासहित अधिकारसम्पन्न बनाउने तर नागरिकसँगको व्यवहार र कर्तव्य निर्वाहमा पनि सुधार गर्नुपर्ने उनको भनाइ छ। राष्ट्रिय यातायात नीति २०८३ मा सुधारका विषय समेटिएको उल्लेख गर्दै उनले नीतिमा मात्र होइन, व्यवहारमै परिवर्तन देखिनुपर्ने बताए।
गजुरेलले ट्राफिक नियम उल्लंघनमा एक लाखदेखि डेढ लाख रुपैयाँसम्म जरिवाना गर्ने विषय अहिले छलफलमै रहेको र कार्यान्वयनमा नआएको स्पष्ट पारे। जरिवानाको रकम निर्धारणअघि नागरिक र सरोकारवाला निकायसँग छलफल गरिने उनले बताए। ट्राफिक नियम कडाइका साथ लागू गर्नुपर्ने भए पनि नागरिकलाई नियमबारे जानकारी गराउने जनचेतनामूलक कार्यक्रम पनि प्रभावकारी रूपमा सञ्चालन गर्नुपर्नेमा उनले जोड दिए।
