राजबिराज । सुनसरीको देवानगञ्ज गाउँपालिका–३, कप्तानगञ्जमा प्रहरीको गोली लागेर एक युवकको मृत्यु भएको घटनाको विरोधमा सप्तरीमा प्रदर्शन चर्किएको छ। विरोधस्वरूप सदरमुकाम राजबिराज र हनुमाननगर बजार बन्द गरिएका छन् भने विभिन्न स्थानमा सडक अवरुद्ध पारिएको छ।
तिरहुत गाउँपालिका–४ डिमनस्थित हुलाकी सडकमा प्रदर्शनकारीहरूले अवरोध सिर्जना गरेका छन्। यसअघि कञ्चनरूप नगरपालिका–११ सिमरा चोकमा युवाहरूले टायर बालेर पूर्व–पश्चिम राजमार्गमा केहीबेर चक्काजाम गरेका थिए।
प्रदर्शनकारीहरूले घटनाको निष्पक्ष छानबिन, पीडित परिवारलाई उचित क्षतिपूर्ति, घाइतेको निःशुल्क उपचार तथा घटनामा संलग्न दोषीमाथि कानुनी कारबाहीको माग गरेका छन्।
यता, देवानगञ्जमा जारी कर्फ्युको प्रभाव छिमेकी जिल्ला सप्तरीमा पनि देखिन थालेको छ। पूर्वी नाकाबाट हुने ढुवानी प्रभावित भएपछि खाना पकाउने एलपी ग्यासको आपूर्तिमा समस्या देखिएको व्यवसायीहरूले बताएका छन्।
यसअघि सप्तरीका प्रमुख जिल्ला अधिकारी श्यामकृष्ण थापाको अध्यक्षतामा बसेको सर्वदलीय बैठकले सामाजिक तथा धार्मिक सद्भाव कायम राख्न दुई बुँदे सहमति गरेको थियो। तर, त्यसविपरीत प्रदर्शन जारी रहेकाले जिल्लाको सुरक्षा अवस्था थप चुनौतीपूर्ण बनेको प्रशासनको भनाइ छ।
उल्लेखनीय छ, आइतबार राति सुनसरीको देवानगञ्ज–३, कप्तानगञ्जमा दुई समूहबीच भएको झडप नियन्त्रण गर्ने क्रममा प्रहरीले चलाएको गोली लागेर एक युवकको मृत्यु भएको थियो। त्यसयता उक्त घटनालाई लिएर सुनसरीसहित आसपासका जिल्लामा तनाव कायम छ।
