काठमाडौं। नेपाली कांग्रेसको १५औँ महाधिवेशनबाट गगनकुमार थापाको नेतृत्वमा निर्वाचित केन्द्रीय कार्यसमितिलाई अद्यावधिक गर्न पार्टी निर्वाचन आयोग पुगेको छ।
निर्वाचन आयोगमा नयाँ कार्यसमितिको विवरण बुझाएपछि सञ्चारकर्मीसँग कुरा गर्दै महामन्त्री प्रदीप पौडेलले पार्टीको विधान, संविधान र प्रचलित कानुनी व्यवस्थाअनुसार महाधिवेशन सम्पन्न गरी निर्वाचित नयाँ कार्यसमितिको विवरण अद्यावधिक गर्न आएको बताए।
उनका अनुसार राजनीतिक दलसम्बन्धी ऐनको दफा ५१ मा केन्द्रीय कार्यसमितिमा परिवर्तन भएपछि निर्वाचन आयोगमा विवरण अद्यावधिक गर्नुपर्ने व्यवस्था छ। सोही व्यवस्थाअनुसार गगनकुमार थापाको सभापतित्वमा निर्वाचित कार्यसमितिको विवरण आयोगमा बुझाइएको उनले बताए।
महामन्त्री पौडेलले कांग्रेसको १५औँ महाधिवेशन विधिवत् रूपमा सम्पन्न भएको दाबी गर्दै त्यसमा व्यापक सहभागिता र उत्साह देखिएको बताए। आठ महिनाको अवधिमा दुईवटा महाधिवेशन सम्पन्न गरेको उल्लेख गर्दै उनले विशेष महाधिवेशनपछि नियमित महाधिवेशन गरिएको र सबैलाई प्रतिस्पर्धामा सहभागी हुने वातावरण बनाइएको बताए।
