काठमाडौं। राष्ट्रिय प्रजातन्त्र पार्टी (राप्रपा)की प्रमुख सचेतक खुश्बु ओलीले न्यायालयमा देखिएका विकृति र विसङ्गति अन्त्य गर्न व्यापक सुधारसहित पुनःसंरचना आवश्यक रहेको बताएकी छन्।
सोमबार नेपाली कांग्रेसको आह्वानमा सिंहदरबारमा बसेको प्रतिपक्षी दलहरूको बैठकपछि सञ्चारकर्मीसँग कुरा गर्दै ओलीले सर्वोच्च अदालतका न्यायाधीश र प्रधानन्यायाधीशसमेतको नाम जोडिएर विभिन्न घटना सार्वजनिक हुनुले न्यायालयप्रतिको जनविश्वास कमजोर बनाएको बताइन्।
एक–दुई जनामाथि महाभियोग लगाउँदैमा न्यायालयको समग्र सुधार सम्भव नहुने उनको भनाइ छ। उनले भनिन्, ‘एक–दुई जना व्यक्तिहरूमा महाभियोग लागेर मात्र यो पूर्ण रूपमा सुधार हुँदैन।’
न्यायालयमा देखिएका विकृति अन्त्यका लागि पुनःसंरचनामै जानुपर्नेमा जोड दिँदै उनले यस विषयलाई संसद्मा गम्भीर बहसको विषय बनाउनुपर्ने बताइन्। त्यसका लागि यथाशीघ्र संसद् बैठक आह्वान गर्न पनि उनले माग गरिन्।
त्यस्तै, प्रहरी र सरकारबीचको सम्बन्ध तथा अर्थमन्त्री डा. स्वर्णिम वाग्लेले भारतमा दिएको अभिव्यक्तिलगायत विषयमा पनि संसद्मा छलफल हुनुपर्ने ओलीले बताइन्।
