काठमाडौँ । नेपाल चिकित्सक सङ्घले वीरगञ्जस्थित नारायणी अस्पतालमा चिकित्सक तथा स्वास्थ्यकर्मीमाथि भएको आक्रमण र अस्पतालमा गरिएको तोडफोडका दोषीमाथि कारबाही नभएको भन्दै आज पनि देशभरका अस्पतालमा आकस्मिकबाहेकका सबै सेवा बन्द गरेको छ।
सङ्घको मंगलबार बसेको आकस्मिक केन्द्रीय कार्यसमिति बैठकले दोषीलाई तत्काल पक्राउ गरी कानुनी कारबाही गर्न सरकार उदासीन रहेको भन्दै बुधबार देशभरका अस्पताल, मेडिकल कलेज तथा स्वास्थ्य संस्थामा आकस्मिकबाहेकका सबै सेवा स्थगित गर्ने निर्णय गरेको थियो।
सङ्घले घटना भएको चार दिन बितिसक्दा पनि दोषीलाई पक्राउ गरी कारबाही नगरी न्याय माग्न पुगेका चिकित्सकमाथि पर्साका प्रमुख जिल्ला अधिकारी र प्रहरी प्रमुखले दुर्व्यवहार गरेको आरोप लगाएको छ। यस घटनालाई सङ्घले अत्यन्तै लज्जास्पद भन्दै सरकारको भूमिकाप्रति असन्तुष्टि जनाएको छ।
आन्दोलनका कार्यक्रमअनुसार आज बिहान १० बजे काठमाडौँ उपत्यकाका चिकित्सक तथा स्वास्थ्यकर्मी माइतीघर मण्डलामा भेला भई विरोध प्रदर्शन गर्नेछन्। यस्तै, उपत्यका बाहिरका चिकित्सकहरूले सम्बन्धित जिल्ला प्रशासन कार्यालयमा ज्ञापनपत्र बुझाउने तथा आफू कार्यरत स्वास्थ्य संस्थामा धर्ना दिई विरोध जनाउने कार्यक्रम तय गरिएको छ।
