काठमाडौं । काठमाडौं महानगरपालिकाको टेकुमा निर्माणाधीन नयाँ प्रशासनिक भवनको भौतिक प्रगति ३५ प्रतिशत पुगेको छ । निर्माण सुरु भएको ९४ दिनमै ३० प्रतिशत वित्तीय र ३५ प्रतिशत भौतिक प्रगति हासिल भएको भवन निर्माण परियोजनाले जनाएको छ ।
परियोजनाका प्रोजेक्ट डाइरेक्टर महेश भट्टका अनुसार गत चैत २२ गते सुरु भएको निर्माण कार्यअन्तर्गत बेसमेन्ट निर्माण सम्पन्न भइसकेको छ भने अहिले बेसमेन्टको कभर स्ल्याब ढलानको तयारी भइरहेको छ ।
उनले भवनको संरचना निर्माण तीव्र गतिमा अघि बढेकाले सम्झौतामा तोकिएको २०८४ साल कार्तिक २२ गतेभन्दा अगावै निर्माण सम्पन्न गर्ने लक्ष्य राखिएको बताए ।
भट्टका अनुसार हाल निर्माणस्थलमा ७० जना दक्ष तथा अदक्ष कामदार कार्यरत छन् । प्रोजेक्ट म्यानेजर, साइट सुपरभाइजरलगायत १० जना प्राविधिक जनशक्ति पनि परिचालन गरिएको छ । निर्माणस्थलमा आवश्यक सबै सुरक्षा मापदण्ड र सेफ्टी प्रोटोकल पालना गर्दै काम भइरहेको उनले बताए ।
करिब ६ रोपनी क्षेत्रफलमा निर्माण भइरहेको आठतले प्रशासनिक भवनको बुधबार काठमाडौं महानगरपालिकाकी कार्यवाहक प्रमुख सुनिता डंगोलले स्थलगत अनुगमन गरेकी थिइन् । अनुगमनका क्रममा उनले निर्माण कम्पनीलाई गुणस्तर कायम राख्दै तोकिएको समयमै निर्माण सम्पन्न हुने गरी कामलाई थप प्रभावकारी बनाउन निर्देशन दिइन् ।
