काठमाडौँ । प्रतिनिधि सभा सदस्य तथा पूर्वमन्त्री महावीर पुनले आफ्नो सम्पत्ति विवरण सार्वजनिक गरेका छन्।
विवरणअनुसार उनीसँग कास्की जिल्लामा करिब २८ रोपनी जग्गा, करिब तीन तोला सुन तथा विभिन्न बैंक खातामा नगद मौज्दात रहेको उल्लेख छ।
पुनले पोखरा महानगरपालिका-७ माझठानास्थित चार स्थानमा रहेको करिब २८ रोपनी जग्गा २०५२ सालतिर पदम पुनसँग साझेदारीमा खरिद गरेको जनाएका छन्। उक्त जग्गा खरिदका लागि करिब ४ लाख रुपैयाँ खर्च भएको उल्लेख गर्दै रकमको स्रोत अमेरिकाबाट फर्कँदा बचत भएको स्वआर्जित रकम रहेको बताएका छन्। उनले उक्त जग्गा राष्ट्रिय आविष्कार केन्द्र सञ्चालनका लागि बिक्रीमा राखिएको भए पनि हालसम्म बिक्री नभएको जानकारी दिएका छन्।
उनले करिब तीन तोला सुन २०६० सालतिर खरिद गरिएको उल्लेख गरेका छन्। तर त्यसको स्रोतमा पत्नीलाई आफन्त तथा इष्टमित्रबाट उपहारस्वरूप प्राप्त भएको विवरणमा जनाइएको छ।
बैंक मौज्दाततर्फ नेपाल बैंक लिमिटेडमा करिब ४ लाख रुपैयाँ र राष्ट्रिय वाणिज्य बैंकमा करिब २५ लाख रुपैयाँ रहेको पुनले सार्वजनिक गरेका छन्। नेपाल बैंकमा रहेको रकम व्यक्तिगत खर्च प्रयोजनका लागि साथीहरूबाट प्राप्त भएको उल्लेख गरिएको छ।
त्यसैगरी राष्ट्रिय वाणिज्य बैंकमा रहेको रकम प्रतिनिधिसभा निर्वाचनका क्रममा सहयोगीहरूले उपलब्ध गराएको चन्दाबाट बाँकी रहेको जनाइएको छ। पुनले उक्त रकम आफू निर्वाचित क्षेत्र म्याग्दीको सदरमुकाम बेनीस्थित सम्पर्क कार्यालय सञ्चालनमा प्रयोग गर्ने बताएका छन्।
उनले आफ्नो आत्मकथा पुस्तक बिक्रीबाट हालसम्म करिब २ लाख ५० हजार रुपैयाँ आम्दानी भएको र सो रकम राष्ट्रिय आविष्कार केन्द्र तथा वीरगञ्ज कृषि औजार कारखाना सञ्चालनका लागि राष्ट्रिय आविष्कार केन्द्रको नाममा नेपाल बैंक लिमिटेडमा जम्मा गरिएको जानकारी दिएका छन्।
सार्वजनिक विवरणअनुसार पुनसँग यसबाहेक ऋण दायित्व, सवारीसाधन, कृषि तथा पशुधन वा अन्य उल्लेखनीय सम्पत्ति नरहेको जनाइएको छ।
