काठमाडौं, १५ असोज । दक्षिण सुडान स्थित संयुक्त राष्ट्र संघिय शान्ति मिसन ‘युनाइटेड नेसन्स मिसन इन साउथ सुडान’ मा तैनाथ नेपाली शान्ति सेनाको अदलीबदली भएको छ ।
तारादल गण (शान्ति सेना) तेह्रौँ डफ्फालाई बदली गर्न खटिएको श्रीनाथ गण (शान्ति सेना) चौधौँ डफ्फाका १७५ जना शान्ति सैनिकहरूको अन्तिम टोली आज त्यसतर्फ प्रस्थान गरेका हुन् ।
सेनानी पूर्ण बहादुर चन्दको नेतृत्वमा संयुक्त राष्ट्र संघको चार्टर्ड विमानद्वारा मिसन इलाकातर्फ प्रस्थान गरेको सैनिक जनसम्पर्क तथा सूचना निर्देशनालयले जनाएको छ ।
गणपति प्रमुख सेनानी सुरेश देवकोटाको कमाण्डमा रहेको सो गणका ५२५ जना शान्ति सैनिक यस अगावै मिसन इलाका पुगिसकेका छन् ।
सोही मिसनमा आफ्नो कार्यकाल सम्पन्न गरी तारादल गण (शान्ति सेना) तेह्रौँ डफ्फाका १७५ जना शान्ति सैनिकहरूको अन्तिम टोली गणपति, प्रमुख सेनानी अनिल के.सी.को नेतृत्वमा मिति २०८१ आश्विन १४ गते स्वदेश फिर्ता भएका थिए।
दक्षिण सुडानमा रहेको संयुक्त राष्ट्र संघिय शान्ति मिसनमा नेपाली सेनाको दुई वटा गण, एउटा गुल्म सहित कुल एक हजार ७५६ जना शान्ति सैनिक कार्यरत छन् ।
