सिरहा, २ असोज । स्रोत नखुलेको सोह्र लाख रुपैयाँसहित सिरहाबाट एक जना पक्राउ परेका छन् ।
जिल्लाको बरियारपट्टी गाउँपालिका-१ गोरगम्मा स्थित नेपाल भारत सीमा क्षेत्रमा भारतबाट नेपालतर्फ मोटरसाइकलमा आउँदै गरेका एक व्यक्तिको साथबाट प्रहरीले सोह्र लाख नगद बरामद गरेको हो ।
पक्राउ पर्ने व्यक्ति सिरहा बरियारपट्टी गाउँपालिका-२ खोक्सिटोल बस्ने अन्दाजी ४८ वर्षको ललित दास रहेको जिल्ला प्रहरी कार्यालय सिरहाका प्रवक्ता प्रहरी नायव उपरीक्षक मुक्तिनाथ सापकोटाले बताए ।
गोप्य सूचनाको आधारमा प्रहरी चौकी कचनारी, सिरहाबाट प्रहरी सहायक निरीक्षक बिरेन्द्र साहको कमान्डमा खटिएको प्रहरी टोलीले चेकजाँच गर्ने क्रममा स.१० प. ९८५३ नम्बरको मोटरसाइकलमा सवार दासको साथबाट एक हजार दरको एक हजार वटा र ५०० दरको १२०० वटा नोट भेटिएको डिएसपी सापकोटाले बताए ।
दासले कम्मरमा सेतो गम्छामा बाँधी ल्याउँदै गरेको उक्त रकमको स्रोत खुलाउन नसकेपछि, मोटरसाइकल सहित उनलाई नियन्त्रणमा लिई इलाका प्रहरी कार्यालय महेशपुरपतार, सिरहाबाट हुण्डी सम्बन्धी कसुरमा थप अनुसन्धान कार्य भइरहेको प्रहरीले जनाएको छ ।
