काठमाडौं, ३० भाद्र । परराष्ट्रमन्त्री आरजु राणा सोमवार क्यानडा भ्रमणमा जाने भएकी छिन् ।
परराष्ट्रमन्त्री राणा विश्वभरका महिला परराष्ट्रमन्त्रीहरूको सम्मेलनमा भाग लिन जान क्यानडा जान लागेको उनको सचिवालयले जानकारी दिएको छ ।
क्यानडाको टोरन्टोमा सेप्टेम्बर १९ र २० मा यो कार्यक्रम हुन लागेको हो । कार्यक्रममा विश्वका करिब २० जना महिला परराष्ट्रमन्त्री सहभागी हुदैछन् ।
सो सम्मेलनलाई सम्बोधन गरेपछि परराष्ट्रमन्त्री राणा संयुक्त राष्ट्रसंघको महासभामा भाग लिन २१ सेप्टेम्बरमा अमेरिकाको न्युयोर्क जाने कार्यक्रम रहेको उनको सचिवालयले जानकारी दिएको छ ।
परराष्ट्रमन्त्री भएपछि पहिलो विदेश भ्रमणको रुपमा भारत गएकी राणाले प्रधानमन्त्री नरेन्द्र मोदी, विदेशमन्त्री एस जयशंकर, भारतीय जनता पार्टीका विदेश विभाग प्रमुख डा. विजय चौथाइवालेसँग भेटवार्ता गरेकी थिइन् । परराष्ट्रमन्त्री राणालाई भारत सरकारले प्रधानमन्त्री सरहै महत्व दिएको भन्दै चर्चा भएको थियो ।
अमेरिकाको वासिङ्टनमा हुने संयुक्त राष्ट्र संघको महासभामा प्रधानमन्त्री केपी शर्मा ओली पनि जाँदैछन् ।
