गोरखा, २४ श्रावण । श्रीमतीको हत्या गरेर त्यसलाई आत्महत्या देखाउन खोज्ने व्यक्तिलाई अदालतले पुर्पक्षको लागि जेल चलान गरेको छ ।
जिल्लाको बारपाक सुलिकोट गाउँपालिका-७ बालुवा बस्ने सुनिता नेपाली गत असार २६ गते आफ्नै घरभित्र बलोमा सलको पासो लगाएर झुण्डिएको देखेर बचाउनको लागि आफूले पासो काटेको भन्दै उनका श्रीमानले छरछिमेकमा खबर गरेका थिए ।
प्रहरीमा उक्त खबर पुगेपछि जिल्ला प्रहरी कार्यालय गोरखाबाट खटिएको प्रहरीले घटनास्थलबाट शव सङ्कलन गरेर घटनाको सूक्ष्म तरिकाले अनुसन्धान सुरु गर्यो ।
घटनाको सूक्ष्म अनुसन्धानको क्रममा सुनितालाई उनकै श्रीमान् ३१ वर्षका कुमार सार्कीले कुटपिट गरी हत्या गरेको खुल्न आएको जिल्ला प्रहरी कार्यालय गोरखाका सूचना अधिकारी प्रहरी निरीक्षक ध्रुव प्रसाद शर्माले जानकारी दिए ।
‘घटना लुकाउनका लागि झुण्डिएको देखाउन सलको पासो समेत काटेको खुल्न आएपछि हामीले पक्राउ गरेर मुद्दा दायर गरेका हौं’, उनले भने ।
मृतक महिलाका भाईले आफ्ना भिनाजुले दिदीको हत्या गरेर आत्महत्याको नाटक रचेको भन्दै प्रहरीमा लिखित जाहेरी दिएका थिए ।
उक्त जाहेरीपश्चात् प्रहरीले सार्कीलाई असार ३० गते पक्राउ गरेर ज्यान सम्बन्धी कसुर (कर्तव्य ज्यान) शीर्षकमा मुद्दा दर्ता गरेर अनुसन्धान पश्चात् जिल्ला सरकारी वकिलको कार्यालयमार्फत अदालतमा पेस गर्यो ।
गोरखा जिल्ला अदालतले श्रावण २३ गते उक्त मुद्दामा सार्कीलाई पुर्पक्षको लागि थुनामा पठाउने निर्णय गरेको अदालतका स्रेस्तेदार मदनराज भट्टराईले केटिएम दैनिकलाई बताए ।
