काठमाडौं, १८ श्रावण । नवनियुक्त तीनवटा प्रदेशका प्रमुखले राष्ट्रपतिसमक्ष पद तथा गोपनियताको शपथ लिएका छन् ।
बुधबार बागमती प्रदेश प्रमुखमा कैलालीका दीपक प्रसाद देवकोटा, लुम्बिनी प्रदेश प्रमुखमा रोल्पा घर भएका कृष्णबहादुर घर्तीमगर र कर्णाली प्रदेश प्रमुखमा बझाङ घर भएका यज्ञराज जोशीलाई राष्ट्रपतिले नियुक्त गरेका थिए ।
नवनियुक्त प्रदेशप्रमुखले बिहीबार नेपालको संविधानको धारा १६७ बमोजिम प्रदेश प्रमुख पदको पद तथा गोपनीयताको शपथ ग्रहण गरेको राष्ट्रपतिको कार्यालयका प्रवक्ता शैलजा रेग्मी भट्टराईले जानकारी दिइन् ।
केपी शर्मा ओली नेतृत्वको सरकारले यसअघिका बाग्मती प्रदेश प्रमुख यादवचन्द्र शर्मा, लुम्बिनीका प्रमुख अमिक शेरचन र कर्णालीका प्रमुख तिलक परियारलाई पदमुक्त गर्न राष्ट्रपतिलाई सिफारिस गरेसँगै उनीहरू पदमुक्त भएका थिए ।
