बिराटनगर । नक्कली प्रहरी बनेर लुटपाट गर्ने दुई जनालाई जिल्ला प्रहरी कार्यालय मोरङले पक्राउ गरेको छ ।
असोज २२ गते बिराटनगर-१२ का रवि कुमार साह सुडीलाई बिराटनगर-११ मा हामी प्रहरी हौ भन्दै नियन्त्रण लिएर लुटपाट गरेको भन्ने सूचनाका आधारमा जिल्ला प्रहरी कार्यालय मोरङबाट खटिएको प्रहरी टोलीले अनुसन्धानको क्रममा उनीहरुलाई पक्राउ गरेको हो ।
पक्राउ पर्नेहरुमा बिराटनगर-१ का ३८ बर्षीय दिपक तामाङ र बिराटनगर-४ का सुनिल थापा रहेका छन् । पक्राउ परेका दुबै जनाले सुडीलाई घर नजिकैबाट पिछा गरेको र बिराटनगरको रोडशेष चोकमा पुगेपछि मोटरसाईकल रोक्न लगाएर हामी प्रहरी हौ भनी बिराटनगरको हनुमान मन्दिर छेउमा लगेर लुटपाट गरेको खुल्न आएको छ ।
उनीहरूको साथबाट प्रहरीले बा ६७ प २५०४ नम्बरको बुलेट मोटरसाइकल समेत बरामद गरेको छ । उक्त मोटरसाइकल लुटपाटमा प्रयोग भएको प्रहरीको प्रारम्भिक अनुसन्धानको क्रममा खुलेको छ ।
त्यस्तै पक्राउ परेका दिपक तामाङको घरबाट नगद पाँच लाख ६५,००० हजार नगद पनि प्रहरीले नियन्त्रणमा लिएको छ ।
तामाङको साथबाट रविकुमार साहको नागरीकता, उनको नामको बैंकको चेकबुक, एटिएम तीन थान, मोवाइल र मोटरसाइकलको ब्लुबुक बरामद भएको मोरङ प्रहरी प्रवक्ता डिएसपी रञ्जनकुमार दाहालले जानकारी दिए ।
दाहाललका अनुसार लुटपाटमा संलग्न सुनिल थापाको घरबाट नगद रु तीन लाख बरामद भएको छ ।
दुवैको घरबाट बरामद भएको नगद रुपैयाँ लुटपाट गरेको जम्मा गरेको प्रहरीको अनुसन्धानको क्रममा खुलेको छ ।