ललितपुर । नक्कली/जाली अमेरिकी डलरसहित ललितपुरबाट एक व्यक्ति पक्राउ परेका छन् ।
पक्राउ पर्नेमा सिन्धुपाल्चोक, बाह्रबिसे नगरपालिका-६ घर भई काठमाडौंको स्वयम्भू बस्ने बर्ष ६५ को पाल्ताङ तामाङ रहेका छन् ।
प्रहरीको विभिन्न अनुसन्धानमा यस प्रकारको ठगी गर्ने व्यक्तिहरूले पीडितलाई मसँग अमेरिकी डलर छ सस्तो दरमा साटिदिन्छु भन्दै फोन गर्ने गरेको र उनीहरूलाई अमेरिकी डलरजस्तो देखिने गरी फोटोकपी गरिएका कागजका बण्डल लुकाएर दिने गरेको पाइएको छ ।
आफूले नेपाली रकम लिएपछि उनले पीडितहरूलाई यहाँ डलरको बण्डल नखोल्नु प्रहरीले देख्न सक्छ अलि एकान्त ठाउँमा गएर हेर्नु भन्दै पीडितहरूलाई पठाएर आफू बेपत्ता हुने गरेका थिए ।
तामाङले फोन गरेका व्यक्ति मध्ये एकजना (हरिचन्द्र बम्जन) ले प्रहरी परिसर ललितपुरमा यस विषयमा जानकारी गराएका थिए । तामाङले बम्जनलाई आफूसँग ५६ हजार ३५० अमेरिकी डलर रहेको उक्त रकम सटही गर्नु पर्यो, तपाईलाई चाहिन्छ भने सस्तो रेटमा दिन्छु भनि पटक पटक फोन गरेका थिए ।
उक्त जानकारीपश्चात ललितपुरबाट खटिएको प्रहरीले तामाङले ललितपुर महानगर-२५ नल्लुखोलाबाट पक्राउ गरेको हो । उनको साथबाट कागज काटेर बनाईएको नक्कली अमेरिकी डलरजस्तो देखिने ११ वटा बण्डल र १०० दरका २२ थान नक्कली नोटसमेत बरामद गरिएको छ ।
तामाङमाथि ठगी उद्योग तथा मुद्रा (खोटा चलन) सम्वन्धी कसुरमा ललितपुर जिल्ला अदालतबाट म्याद थप गरेर अनुसन्धान जारी रहेको प्रहरी उपरीक्षक नवराज कार्कीले केटिएम दैनिकलाई बताए ।