काठमाडौं । अमेरिका लगायतका देशहरूमा पठाइदिन्छु भन्दै १०१ जनालाई ठगेको आरोपमा प्रहरीले एक जनालाई पक्राउ गरेको छ ।
पक्राउ पर्नेमा भक्तपुरको चाँगुनारायण नगरपालिका-६ तेलकोट, नगरकोट बस्ने वर्ष ६८ को सिताराम बास्तोला रहेका छन् ।
उनले १०१ जनालाई वैदेशिक रोजगारीको लागि अमेरिका, जर्मनी, बेलायत तथा जापान पठाइदिन्छु प्रतिव्यक्ति लागत ३० लाख रुपैयाँ लाग्छ भन्दै उनीहरूबाट पटक पटक गरी तीन करोड ५६ लाख आठ हजार रुपैयाँ ठगेर सम्पर्कबिहीन भएका थिए ।
बास्तोलाले पीडितहरूलाई ती देशमा पुगेपछि प्रतिष्ठित कम्पनीमा काम लगाइदिने र मासिक चार लाख तलब हुने प्रलोभन देखाएका थिए ।
बास्तोलालाई हिजो (आइतबार) भक्तपुरको दरबारस्वाक्वारबाट काठमाडौं उपत्यका अपराध अनुसन्धान कार्यालयको टोलीले पक्राउ गरेको हो । उनलाई थप अनुसन्धान तथा कारबाहीको लागि वैदेशिक रोजगार विभाग, बुद्धनगर पठाइएको कार्यालयका प्रवक्ता प्रहरी उपरीक्षक रविन्द्र रेग्मीले बताए ।