झापा । २०७३ सालमा झापाको दमकमा मोटरसाइकल दुर्घटनामा एक पैदलयात्रुको निधन भयो । उक्त दुर्घटनामा फरार मोटरसाइकल चालक अहिले जेल चलान भएका छन् ।
घटना २०७३ साल चैत २३ गतेको हो । सवारी चालक अनुमतिपत्र नभएका पवन लिम्बुले चलाएको मोटरसाइकलले पैदलयात्री नरेश पुलामी मगरलाई ठक्कर दिएको थियो ।
उक्त दुर्घटनामा घाइते भएका मगरको उपचारको क्रममा निधन भयो । प्रहरीले लिम्बुलाई नियन्त्रणमा लिएर सवारी ज्यान मुद्दा अगाडि बढायो ।
त्यसक्रममा अदालतमा ५० हजार रुपैयाँ धरौटी राखेर २६ दिन थुनामा बसेपछि उनी रिहा भए । अदालतको अन्तिम फैसला आउन केही समय लाग्यो । झापा जिल्ला अदालतका न्यायाधीश उद्धवप्रसाद भट्टराईले २०७५ साल असार ५ गते गरेको फैसलाले चालकलाई दोषि ठहर गर्यो ।
उनलाई दुई वर्ष कैद सजाय तोकिएकोमा थुनामा बसेको २६ दिन कटाएर एक वर्ष ११ महिना चार दिन कैद सजाय तोकिएको अदालतको फैसलामा उल्लेख छ ।
अदालतको आदेशसँगै फरार रहेका लिम्बु अहिले पक्राउ परेका छन् । ईलाका प्रहरी कार्यालय दमक झापाबाट खटिएको प्रहरी टोलीले उनलाई बिहीबार पक्राउ गरेर शुक्रबार जेल पठाएको जिल्ला प्रहरी कार्यालय झापाका प्रवक्ता प्रहरी नायव उपरीक्षक खगेन्द्र प्रसाद रिजालले बताए ।
