काठमाडौँ । वरिष्ठ पत्रकार तथा साहित्यकार गोपालप्रसाद थपलियाको कविताकृति ‘सत्ताको मान्छे’ माथि आज अन्तर्क्रिया आयोजना गरिएको छ ।
पेरोल साहित्य प्रतिष्ठानले आयोजना गरेको कार्यक्रममा नेपाल प्रज्ञा प्रतिष्ठानका पूर्वकुलपति गङ्गाप्रसाद उप्रेतीले जनताका मनका आवाजलाई थपलियाले कविताका माध्यमबाट प्रस्फुटन गराएको बताए। उनले प्रज्ञा प्रतिष्ठानको वर्तमान नेतृत्वले नेपाली भाषा र विगतमा निर्णय गरिएका आजीवन प्राज्ञ सदस्यहरूप्रति पूर्वाग्रही व्यवहार प्रदर्शन गरेको टिप्पणी गरे ।
प्रज्ञा प्रतिष्ठानका पूर्वसदस्यसचिव प्रा जगत्प्रसाद उपाध्यायले थपलियाले पत्रकारिताको आफ्नो सङ्घर्षपूर्ण जीवनको जगमा कविता सङ्ग्रह तयार गरेको बताए। वरिष्ठ पत्रकार पुरुषोत्तम दाहालले थपलिया प्रेस स्वतन्त्रता आन्दोलनका अग्रज भएको र उनले निष्ठापूर्वक अक्षरका माध्यमबाट जनताको सेवा गरेको उल्लेख गरे ।
समालोचक प्रा डा हेमनाथ पौडेल, प्रा सावित्री मल्ल कक्षपति र डा हरिप्रसाद सिलवालले ‘सत्ताको मान्छे’ ले राजनीतिक र सामाजिक क्षेत्रका समस्या तथा विकृतिलाई स्पष्टरूपमा बाहिर ल्याएको बताए। कृतिका स्रष्टा थपलियाले आफूले निजी स्वार्थ र लाभको आकाङ्क्षा नराखी जनताको मुक्तिकै खातिर सरकारी जागिर छाडेर पत्रकारिता र साहित्यमा समर्पित भएको जनाए।
पञ्चायतकालमा जेलनेलसहित पत्रकारिता र प्रेस स्वतन्त्रताको आन्दोलनमा सक्रिय ‘छलफल’ साप्ताहिकका प्रधानसम्पादक थपलिया लोकतान्त्रिक जनआन्दोलनमा घाइते भई लामो समय स्वास्थ्योपचारमा रहँदाको अवस्थामा पनि साहित्यिक सिर्जना गर्दै आएका छन्। एक सय ६४ पृष्ठको सो कृति मकालु प्रकाशन गृहले प्रकाशन गरेको हो ।
