विभिन्न बहाना तथा छुट्टाछुट्टै परिचय दिएर करौडौको ठगी गर्दै आएका नटरलाल उप नामले परिचित दार्चुलाका पदमराज भट्टलाई प्रहरीले पक्राउ गरेको छ ।
बैङ्क तथा वित्तीय संस्थाको प्रमुख रहेको र त्यहाँ बाट ऋण उपलव्ध गराईदिने बहानामा होस वा अर्काको नामको जग्गा आफ्नो भन्दै बेचेर नक्कली पुर्जा दिने, महिलाको अस्लिल भिडियो बनाई बार्गेनिङ गर्ने जस्ता आपराधिक क्रियाकलापमा संलग्न भएको आरोपमा उनलाई प्रहरीले पक्राउ गरेको हो ।
जिल्ला प्रहरी कार्यालय कैलालीका अनुसार नटरलालले कैलाली, कञ्चनपुरलाई ठगी गर्ने मुख्य थलो बनाएका थिए । त्यसबाहेक उनले सुदूरपश्चिम र कर्णाली प्रदेशका केही स्थानमा पनि ठगी गरेको प्रहरीको प्रारम्भिक अनुसन्धानले देखाएको छ ।
दार्चुलाको लेकम गाउँपालिका–१ घर भएका नटरलाललाई धनगढी–३ बाट पक्राउ गरिएको जिल्ला प्रहरी कार्यालय कैलालीले जनाएको छ ।
हाल प्रहरीले नटरलाल माथि आवश्यक अनुसन्धान गरिरहेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक वेदप्रकाश जोशीले बताए । साथै निज नटरलाल उपनाम गरेका पदमराज भट्टबाट ठगिएका व्यक्तिलाई प्रमाण सहित जिल्ला प्रहरीमा जाहेरी दिन पनि प्रहरीले आग्रह गरेको छ ।
