काठमाडौँ उपत्यका ट्राफिक प्रहरी कार्यालयले आज राजधानीमा विभिन्न स्थानमा २०६ यात्रुबाहक सवारीसाधनलाई कारबाही गरेको छ ।
ट्राफिक प्रहरीको विशेष चेकिङमा बम्पर गार्ड ननिकाल्ने ११८ वटा, यान्त्रिक अवस्था ठिक नभएका ४९ र तिब्र गतिमा सवारी साधन चलाउने ३९ जना चालक कारवाहीमा परेको प्रहरी उपरिक्षक अवदेश विष्ट क्षेत्रीले जनाए ।
काठमाडौँको चुच्चेपाटी र कलंकीमा सोमबार दिउँसो गरिएको सवारी साधनको विशेष यान्त्रिक चेकिङका क्रममा अवस्था ठिक नभएका बस, माईक्रोबस, पानी ट्याङकर, मिनी ट्रक र पिकअप भ्यान लगायतका ४९ वटा सवारी साधनका चालकलाई ट्राफिक प्रहरीले कारवाही गरेको छ ।
एसपी विष्टका अनुसार तालिम प्राप्त दक्ष प्राविधिक सहितको टोलिद्धारा आज दिउँसो दुई सय (२००) वटा सवारी साधन चेकजाँच गर्दा ब्रेकको अवस्था ठिक नभएका, वाईफर ठिक नभएका, लाईटहरु नभएका र टायर धेरै घिसिएका ४९ वटा सवारी साधनलाई कारवाही गरेको हो ।
अवस्था ठिक नभएको सवारी साधन चलाउँदा यात्रुको जीवन जोखिममा पर्न सक्ने र सवारी दुर्घटना पनि बढ्ने भएकाले संभावित जोखिम कम गर्न ट्राफिक प्रहरीले समय-समयमा काठमाडौँ उपत्यकाको विभिन्न स्थानमा सवारी साधनको यान्त्रिक अवस्था चेकजाँच गर्दै आएको छ ।
अवस्था ठिक भएका सवारी साधन मात्रै संचालन गरी ट्राफिक व्यवस्थापनमा सहयोग गर्न सम्पुर्ण यातायात व्यवसायी, सवारी धनी तथा चालकलाई ट्राफिक प्रहरीले अनुरोध गर्दै आइरहेका छन् ।
त्यस्तै आज तिब्र गतीमा सवारी साधन चलाउने ३९ जना चालकलाई पनि कारवाही गरिएको छ । ललितपुरको सानेपा र भक्तपुरमा गरिएको चेकिङमा तोकिएको गति भन्दा बढी गतिमा सवारी साधन चलाएका चालकलाई कारवाही गरीएको हो । साथै बम्पर गार्ड ननिकालिएका ११८ वटा सवारी साधन पनि कारबाहीमा परेका छन् ।