गत मङ्सिर ४ गते सम्पन्न भएको प्रतिनिधि सभा र प्रदेशसभाको प्रत्यक्षतर्फ लगभग नतिजा आइसकेको छ । समानुपातिकको मतगणना जारी छ ।
यो समाचार तयार पार्दासम्म प्रतिनिधि सभा समानुपातिकको ९४ लाख ४ हजार ५६४ मत गणना भइसकेको निर्वाचन आयोगले जनाएको छ । यस क्रममा राष्ट्रिय स्वतन्त्र पार्टी कहिले तेस्रो स्थानमा उक्लिरहेको छ भने कहिले नेपाल कम्युनिस्ट पार्टी (माओवादी केन्द्र) र नेपाल समाजवादी पार्टीको एकल चुनाव चिह्न हँसिया हथौडा ।
यी दुई पार्टी समानुपातिकमा तेस्रो हुन सङ्घर्षरत छन् । सोमबार बेलुका ७:१५ बजेसम्मको विवरणअनुसार हँसिया हथौडा १० लाख ७९ हजार ३१ मतका साथ तेस्रो स्थानमा हुँदा यसअगाडि ९१ लाख मत गणनामा तेस्रो स्थानमा रहेको घण्टी चौथो स्थानमा पुगेको छ । राष्ट्रिय स्वतन्त्र पार्टीको घण्टी चुनाव चिह्नमा अहिलेसम्मको मतगणनामा १० लाख ६५ हजार ६९७ मत खसेको निर्वाचन आयोगले जनाएको छ ।
यी दुई पार्टीबीच समानुपातिक मतको अन्तर १३ हजार ३३४ रहेको छ । नेकपा (एमाले) ले २५ लाख ५० हजार ९५९ मतसहित तालिकाको शीर्ष स्थानमा हुँदा नेपाली काँग्रेस २४ लाख १९ हजार २७८ मतसहित दोस्रो स्थानमा छन् । पहिलो र दोस्रो स्थानमा रहेका पार्टीको मतान्तर एक लाख ३१ हजार ६८१ छ ।
राष्ट्रिय प्रजातन्त्र पार्टी (राप्रपा) पाँच लाख ४७ हजार २४९ मतसहित चौथो स्थानमा हुँदा जसपाले तीन लाख ३६ हजार ६५७ मत ल्याएको छ । यी दलहरूले ल्याएको मतको आधारमा तालिकाको शीर्ष छ स्थानमा रहेका दलहरू राष्ट्रिय पार्टी बन्ने निश्चित भइसकेको देखिन्छ ।
नेकपा (एकीकृत समाजवादी) लाई पछि पार्दै सिके राउत नेतृत्वको जनमत पार्टी दुई लाख ७८ हजार ७०० मतसहित तालिकाको सातौँ स्थानमा हुँदा नेकपा (एस) ले दुई लाख ५७ हजार ९७५ मत पाएको छ । यी दुई पार्टी राष्ट्रिय दल बन्न सङ्घर्षरत रहेका छन् ।
समानुपातिक सांसद निर्वाचित हुने विधि
मङ्सिर ४ गते सम्पन्न भएको निर्वाचनमा नेपालमा मतदानमा सहभागी हुने जनसङ्ख्या एक करोड ७९ लाख ८८ हजार ५७० थियो । निर्वाचन आयोगले ६१ प्रतिशत मतदाताले मतदान गरेको प्रारम्भिक अनुमान गरेको छ । यस हिसाबले एक करोड ९ लाख ७३ हजार २८ मत समानुपातिकमा खसेको आयोगको प्रारम्भिक अनुमान छ ।
बदर मत र समानुपातिकमा भोट नहाल्ने सङ्ख्या पाँच लाख मान्ने हो भने पनि एक करोड चार लाख ७३ हजार २८ मत सदर भएको हुनुपर्छ । कुनै पनि दलले प्रतिनिधि सभामा तीन प्रतिशतको थेस्रहोल्ड कटाउनुपर्ने भएकाले थेस्रहोल्ड कटाउनको लागि कम्तीमा तीन लाख १४ हजार १९१ मत ल्याउनुपर्ने देखिन्छ ।
समानुपातिक सांसद चयन गर्दा थ्रेसहोल्ड नकटाउने दलले ल्याएको मत घटाएर बाँकी रहेको मतलाई ११० ले भाग गरिन्छ । सो भागफललाई दलले ल्याएको मतले भाग गर्दा आउने सङ्ख्या नै उक्त दलले पाउने समानुपातिक सांसदको सिट सङ्ख्या हो । कुनै सङ्ख्या दशमलवमा आएको भए त्यस सङ्ख्यालाई राउन्ड फिगर गर्ने गरिन्छ ।
यो पनि पढ्नुहोस् : निर्वाचन २०७९ : यसरी बाँडिन्छ समानुपातिक सिट