दोलखाको वैतेश्वर गाउँपालिकामा सुनाई तथा बोलीजन्य अपाङ्गता (बहिरा) युवती बलात्कृत भएकी छन् । बलात्कृत भएकी २० वर्षीया युवतीको पेटमा १७ देखि २० हप्ताको गर्भ रहेको बताइएको छ ।
जिल्ला प्रहरी कार्यालय दोलखाका प्रमुख डिएसपी गंगा प्रसाद पौडेलका अनुसार केही दिन देखी ती युवतीसँग पीडकको पहिचान खुलाउन अनुरोध गरेता पनि बोल्न र सुन्न नसक्ने भएका कारण पीडक व्यक्तिको पहिचान खुल्न सकिरहेको छैन ।
आज काठमाडौँबाट दोभासे बोलाएर पीडकको बारेमा सोध्दा ती युवतीले गाउँकै एक ७२ वर्षीया वृद्धलाई इङ्गित गरेकी छन् । प्रहरीले थप अनुसन्धानको लागि भन्दै ती वृद्धलाई नियन्त्रणमा लिएको छ । तर ती वृद्धले आफू निर्दोष रहेको बताइरहेका छन् ।
ती युवती सोही जिल्लामा रहेको बहिरा आवास विद्यालयमा अध्ययनरत थिइन् । आफ्नै विद्यालयमा कक्षा ४ मा अध्ययनरत विद्यार्थी गर्भवती रहेको थाहा पाएपछि विद्यालय प्रशासनले घर गएको समयमा बलात्कृत भएको हुनसक्ने भन्दै परिवारलाई गर्भपतन गर्न केही रकमसमेत दिएको खुलेको छ ।
किशोरीको बुवाले गर्भपतन गर्न अस्पताल लगेपछि प्रहरीको अनुमतिबिना गर्भपतन नहुने भएपछि मात्र घटना बाहिरिएको हो । युवतीको पेटमा १७ देखि २० हप्ताको गर्भ रहेको मेडिकल रिपोर्टमा देखिएको भएता पनि विद्यालय प्रशासनले २२ हप्ताको गर्भ रहेको भन्दै हल्ला गरेको नाम नखुलाउने सर्तमा एक स्थानीयले केटिएम दैनिकलाई बताए ।
स्थानीय निर्वाचनको समयमा परिवारले ती युवतीलाई आफ्नो घर लगेका थिए । अहिले युवतीलाई सुरक्षित आवास गृहमा राखिएको छ ।