बझाङको मष्टा गाउँपालिकामा भएको जीप दुर्घटनामा ज्यान गुमाउने चार जनाको पहिचान खुलेको छ ।
दुर्घटनामा मष्टा गाउँपालिका–२ खेतकोटकी १३ वर्षीया सम्झना खड्का, सोही ठाउँका २५ वर्षीय रोशन खड्का, ११ वर्षीय प्रचण्ड खड्का र २८ वर्षीया वसन्ती धामीको घटनास्थलमै ज्यान गएको बझाङका प्रमुख प्रहरी नायब उपरीक्षक (डीएसपी) जागेश्वर भण्डारीले बताए ।
भण्डारीका अनुसार अन्य मृतक र घाइतेको पहिचान खुलेको छैन । बझाङको सदरमुकाम चैनपुर नजिक रहेको डुङ्ग्री बजारबाट मष्टा गाउँपालिका–२ खेतकोट जाँदै गरेको जीप आज दिउँसो दुर्घटना हुँदा छ जनाको घटनास्थलमै ज्यान गएको थियो ।
सु प प्र ०१–००१ च ११७ नम्बरको जीप तुफानडाँडामा दुर्घटनामा परेको थियो । जीप सडकबाट दुई सय मिटर तल भिरमा खसेको थियो । जिल्ला सदरमुकाम चैनपुरमा लाग्ने सिलदेवी मेला हेरेर घर फर्कदै गरेका १६ जना यात्रु बोकेको जीप दुर्घटना भएको हो ।
घटनास्थल जिल्ला सदरमुकामबाट ५-६ किलोमिटरको दुरीमा भएतापनि बीचमा नदी भएको कारण घाइतेलाई झोलुङ्गे पुलबाट सदरमुकाम ल्याइएको बताइएको छ । चालक समेत घाइते भएको हुनाले जीपमा कति जना सवार थिए भन्ने एकिन विवरण आइसकेको छैन । जीपमा १५-१६ जना यात्रु भएको बताइएको छ ।
डिएसपी भण्डारीका अनुसार घाइतेहरूको अवस्था गम्भिर भएकाले मृतकको सङ्ख्या अझै बढ्न सक्ने देखिएको छ । जीप सडकबाट अन्दाजी दुईसय मिटर भिरमा खसेको हो । नेपाल प्रहरी, नेपाली सेना र स्थानीयबासीले घाइतेहरूको उद्दार गरेका थिए ।
